भांगरभूंय | प्रतिनिधी
फक्त 5 टक्के शॅक चालीक; शॅक धनयांच्यो कागाळी
पणजीः दर्यादेगेर शॅकांचो हंगाम सोंपचे पयलींच पावसान खवदळ घाल्ल्यान शॅक धनयांक लुकसाण सोंसचे पडलें. पावसांत शॅकांचें लुकसाण जाल्ल्यान कांय धनयांनी शॅक गुठलायले आनी दर्यादेगेर सुमार 5 टक्के शॅक वेवसाय करतात अशी म्हायती अखील गोंय परंपरीक शॅक धनी संघटणेन दिली.
फाटलें सप्तकभर उटंगाराच्या पावसान धुमशेण कांडिल्ल्यान पर्यटकांची संख्या मात्शी उणी जाल्या, तशेच शॅक वेवसायिकांक हाचो फटको बसला. पावसान नेट धरिल्ल्यान चडशे पर्यटक दर्यादेगेर येनात आनी चडश्या जाणांचे शॅक वाऱ्यान मोडून गेल्यात. जूनांत पावस सुरू जाता म्हूण जून म्हयन्याचे सुरवेक शॅक काडपाचे निर्देश पर्यटन खातें दिता. पूण अंदूं जून म्हयन्यां पयलींच पावस पडिल्ल्यान हो हंगाम वेळा पयलीं सोंपपाच्या मार्गार आसा.
अखील गोंय परंपरीक शॅक धनी संघटणेचे अध्यक्ष मान्युएल कार्दोज हांणी सांगलें, पावस पडिल्ल्यान दर्याचेर पर्यटक कमी जाल्यात देखून शॅक काडप हो पर्याय सारको अशें धनयांक दिसलां. जीं शॅकां दर्याक वचपी वाटेक तेंकून आसात तींच शॅकां चालू आसात. शॅकांचो आंकडो उणो जाल्ल्यान ह्याच शॅकांचेर गिरायक आसा. शॅकांचो हंगाम अजून मेरेन सोंपूक ना. पर्यटन खात्यान 31 मे मेरेन आमकां वेवसाय करपाचें लिसेन्स दिलां. फाटल्या वर्सा लिसेन्सांत बदल करून शॅकाच्या हंगामाच्या काळांत वाड करून दिल्ली. पूण हे फावटी पावसान खवदळ घातला. देखून अंदूं पर्यटन खातें कितें निर्णय घेता तें पळोवचें पडटलें, अशें कार्दोज हांणी सांगलें.
पर्यटकांचो आंकडो उणो जावन कांयच धंदो नाशिल्ल्यान मार्च-एप्रील म्हयन्यांतच खूबप जाणांनी आपलीं शॅकां काडलीं. आतां पावस सुरू जावन 95 टक्के शॅकां दर्यादेगे वेल्यान काडल्यात आनी फक्त 5 टक्के शॅकां उरल्यांत. जीं शॅकां पावस-वाऱ्यांत मोडून गेल्लीं तीं शॅकां गिरायक नाशिल्ल्यान धनयांनी परतून उबारुंकनात. जांकां वेवसाय जाता तांणीच आपलीं मोडिल्लीं शॅका परतून बांदल्यात अशी म्हायती कार्दोज हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
