पावसान पंजाब-कोलकाता मॅच व्हांवली

भांगरभूंय | प्रतिनिधी

इंडियन प्रिमियर लिगेंतली (आयपीएल) 44वी मॅच पावसाक लागून रद्द करची पडली. हांगाच्या इडन गार्डन्स मैदानाचेर पयलीं बॅटींग करतना पंजाब किंग्सान 201 धांवड्यो केल्यो. मोखीचो फाटलाव करपाक कोलकाता नायट रायडर्स मैदानांत देंवलो. पूण, फकत एक ओव्हर जाता थंय आसा, पावसान आपली हाजेरी लायली आनी उपरांत मॅच परतून सुरू जाली ना. मॅच थांबयली त्या वेळार कोलकातान एक ओव्हरीन बिनबाद 7 धांवड्यो केल्ल्यो.

दोनूय पंगडांक एकेक गूण फावो जालो. हे मॅची उपरांत पंजाब 11 गुणां सयत चवथे सुवातेर पावलो.

ते आदीं पंजाब किंग्सान टॉस जिखून पयलीं बॅटींग करपाचो निर्णय घेतलो आनी निर्धारीत 20 ओव्हरींनी 4 विकेटी व्हगडावन 201 धांवड्यो केल्यो.

प्रियांश आर्या आनी प्रभसिमरन सिंग हांणी पंजाबाक उत्कृश्ट सुरवात करून दिली. दोगांयनी कोलकाताची बॉलींग फोडून काडली. पावरप्लेंत तांणी 56 धांवड्यो केल्यो. दोगांयनी 72 बॉलांनी 120 धांवड्यांची भागिदारी केली. पंजाबाक पयलो धपको प्रियांश आर्याच्या रुपान बसलो. तो 35 बॉलांनी 69 धांवड्यो करून बाद जालो. ताणें आठ चवके आनी चार सके मारले. ते उपरांत मुखेली श्रेयस अय्यर बॅटिंगेक आयलो. ताणें प्रभसिमरना वांगडा मेळून डाव मुखार व्हेलो. तांणी दुसरे विकेटी खातीर 16 बॉलांनी 40 धांवड्यांची भागिदारी केली.

प्रभसिमरन 15वे ओव्हरींत बाद जालो. बाद जावचे पयलीं ताणें 49 बॉलांनी स चवके आनी स सक्यांचे मजतीन 83 धांवड्यांची खेळी केली. हे मजगतीं, ताणें आयपीएलांतल्यो आपल्यो एक हजार धांवड्यो पूर्ण केल्यो. तो बाद जाल्या उपरांत कोलकाता नायट रायडर्सान मॅचींत पुनरागमन केलें आनी पंजाबाचे धांवड्यांचे गतीचेर अंकूश दवरलो.

प्रभसिमरन बाद जाल्या उपरांत श्रेयस अय्यराक साथ दिवपाक ग्लॅन मॅक्सवॅल आयलो. पूण, ताणें परतून निर्शेणी हाडली. 8 बॉलांनी एका चवक्याचे मजतीन सात धांवड्यो केल्यो. ताका वरुण चक्रवर्तीन बाद केलो. वरुण चक्रवर्तीन मॅक्सवॅलाक टी-20 प्रकारांत पांचवे खेपे बाद केलो. मॅक्सवॅला उपरांत मार्को जानसेन आपल्या मुखेल्याक साथ दिवपाक मैदानांत आयलो. पूण, तो लेगीत सवाय भितर तंबूंत परतलो. ताका फकत तीन धांवड्यो करप शक्य जाल्यो. ताका वैभव अरोडान बाद केलो.

ते उपरांत जोस इंग्लीसान अय्यरा वांगडा मेळून पंगडाचो स्कोर 200च्या मुखार व्हेलो. अशे तरेन पंजाबान निर्धारीत 20 ओव्हरींनी 4 विकेटी व्हगडावन 201 धांवड्यो केल्यो.