भांगरभूंय | प्रतिनिधी
पणजीः पावसान सध्या बरोच नेट धरला. शेनवारा गोंयाक परतून पावसान झोड दिलो. सांजेच्या 5.30 वरां मेरेन पोरणें गोंया 1.29 इंच जाल्यार पणजे 1.25 इंच पावसाची नोंद जाली.
पावसाक लागून गोंयांत खूबश्या वाठारांनी पडझडीच्यो दोन घडणुको घडल्यो. हवामान खात्यान 14 आनी 15 जुलयाक उटंगाराच्या पावसाची शक्यताय उक्तायल्या. ताका लागून ह्या दोन दिसां खातीर ऑरेंज अलर्ट जारी केला. जाल्यार 16 आनी 17 जुलयाक येलो अलर्ट दिला.
गोंयांत 1 जून ते 13 जुलय ह्या काळांत सरासरी 68.33 इंच पावसाची नोंद जाल्या. वाळपय सगळ्यांत चड 81.54 इंच पावसाची नोंद जाल्या. सांखळे 77.66 इंच, सांग्यार 77.64 इंच, फोंड्यां 70.21 इंच, काणकोणा 69.61 इंच, म्हापश्यां 67.70 इंच, पेडण्यां 67.70 इंच, मडगांवां 65.94 इंच जाल्यार पणजे 65.77 इंच पावसाची नोंद जाल्या. शेनवारा पणजे चडांत चड 27.1 जाल्यार उण्यांत उणें 24 अंश सेल्सियस तापमानाची नोंद जाली. मुरगांवां चडांत चड 28.2 जाल्यार उण्यांत उणें 23.4 अंश सेल्सियस तापमान आशिल्लें. फुडलें पांच दीस गोंयांत चडांत चड तापमान 28 ते 30 अंश जाल्यार उण्यांत उणें तापमान 24 अंश सेल्सियस मेरेन उरपाची शक्यताय आसा. शेनवारा पणजेची आद्रताय 90 टक्के आशिल्ली. फुडले पांच दीस आद्रता 92 ते 98 टक्क्यां मेरेन आसपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
