भांगरभूंय | प्रतिनिधी
संवसारीक टी-20 सर्तीच्या सुपर 12तल्यो मॅची चालू आसात. हे फेरयेंतल्यो चडश्यो मॅची उमळशीक वाडोवपी थारपाक लागल्या. काल मॅलबॉर्न क्रिकेट मैदानाचेर जाल्ले मॅचींत आयर्लेण्डान इंग्लंडाक डकवर्थ लुईस नेमा प्रमाण 5 धांवड्यांनी हारयलो.
वस्तादपणाच्या मुखेल दावेदारांतलो एक आशिल्ल्या इंग्लंडान पयले मॅचींत अफगाणिस्तानाक हारोवन सर्तीक जैतान सुरवात केल्ली. दुसरी मॅच लेगीत तो जिखतलो अशी आस्त जाणकारांक आशिल्ली. ताणें आयर्लेण्डाक 157 धांवड्यांचेर आडावपाक येस मेळयलें. पूण, सुरवातीच्या बॅट्समनांनी केल्ले बाबत प्रदर्शनाक लागून तो 14.3 ओव्हरींनी 105 धांवड्यो करपाक येसस्वी थारिल्लो. त्याच वेळार आयिल्ल्या पावसाक लागून खेळ थांबोवचो पडलो. पावस नेटान पडूंक लागिल्ल्यान खेळ आनीक मुखार जालो ना. अखेरेक डकवर्थ लुईस नेमा प्रमाण पांच धांवड्यांनी फाटीं आशिल्ल्यान आयर्लेण्डाक जैतिवंत घोशीत केलो. इंग्लंडा खातीर ही हार एक खर धपको आसा.
आयर्लेण्डान अंदूंचे सर्तींत दुसरो धपको दिवपी निकाल दिला. पात्रताय फेरयेंत ताणें वॅस्ट इंडिजाचें आव्हान सोंपयिल्लें.
इंग्लंडाक हे मॅचींत म्हणपा सारकें प्रदर्शन करपाक जमूंक ना. मुखेली जोस बटलर (0) आनी अॅलेक्स हेल्स (7) रोखडोच बाद जाले. जोशुआ लिटलान दोगांकूय बाद केले. बेन स्टोक्स 6 धांवड्यो करून तंबूंत परतलो. हॅरी ब्रुक्सान पंगडाक जैत मेळोवन दिवपाचो यत्न केलो. ताणें 21 बॉलांनी 18 धांवड्यो केल्यो. डॅव्हीड मलानान सगल्यांत चड 35 धांवड्यो केल्यो.
ते पयलीं टॉस हारल्या उपरांत पयलीं बॅटींग करपी आयर्लेण्डान 12 ओव्हरी मेरेन 2 विकेटी वगडावन 103 धांवड्यो केल्ल्यो. पूण, उरिल्ल्या आठ बॅट्समनांक फक्त 55 धांवड्यांची भर घालप शक्य जाली. आयर्लेण्डाचो मुखेली अॅण्ड्र्यू बालबर्नीन सगल्यांत चड 62 धांवड्यो केल्यो. इंग्लंडा वतीन लियाम लिव्हिंगस्टोन आनी फास्ट बॉलर मार्क वूड हांणी आयर्लेण्डाचो डाव गडगडावन उडयलो. दोगांयनी दरेकी तीन विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
