पावसान आमकां वाऱ्यार घालें

भांगरभूंय | प्रतिनिधी

अं दूं मिर्गा पयलींच्या पावसान सामकेंच विटयलें. सगलें बुडोवन उडयलें. पिकयिल्लें काडून सांठोवन दवरपाच्या वेळारूच जर पावस आयलो तर कशें जावपाचें? पावसा खातीरचो पुरुमेंत कसो करपाचो? कांय शेतकार बाबडे कश्ट काडून रोयतात आनी पीक हातांत येवचे वेळार ह्या पावसाचेर सांवार येता म्हणल्यार कितें? शेतकारांचो मरणकाळ म्हणचो पडलो ना? सामकोच विटोवंक लागला हो पावस अशें म्हणीन दिसता. तसो पावसूच कित्याक ह्या दिसांनी सगलेच विटोवंक लागल्यात, कोणाचेंच म्हणून आपले जिबेचेर नियंत्रण उरूंक नाशें दिसता. आनी हाकाच लागून नाका आशिल्लें उलोवन हे लोक आपलें हांशें करून घेतात. ते कितें उलयतात तांचें तांकांच कळना काय दिसता. हें सगलें पडिल्ले तापीक लागूनय घडटा आसूं येता. तशें आसल्यार पावसान बेगीन येवन आमचेर उपकार केले म्हणचे पडटलें. वातावरण पळेयात कशें थंड जालां. हाका लागून तकल्योय शांत जातल्यो अशी आस्त बाळगूंक हरकत ना.
तर मिर्गा पयलींच्या पावसान आमकां सामके वाऱ्यार घालें. मायाच्या पंदरा तारखे उपरांत हो पावस हाजेरी लायतलो म्हणपाचें सगल्यांक खबर आसता. आमचें सरकार तर तेच खातीर पंदरा मे उपरांत रस्ते बी फोडूंक बंदी घालता. पंदरा मे उपरांत रस्ते फोडूंक बंदी तें बरें आसा पूण जे रस्ते पयलींच फोडल्यात ताचें कितें? ते सारके करूंक नाका? सरकारान रस्ते फोडपाचेर बंदी घाली म्हणून काय पयलीं फोडिल्ले रस्ते आपशींच सारके जायनात. जांणी फोडल्यात तांणी ते सारके करूंक जाय न्ही? पूण तशें जाल्लें दिसना. फोडिल्ले रस्ते तशेच उरतात. फक्त तातूंत माती भरली म्हणून उपकारना. पावस
पडूंक लागलो म्हणजे ही माती पोंदा वता आनी हे खड्डे चड रूंद जातात. तातूंत उदक भरतकूच तर खड्डो कितलो खोल आसा तें कळप कठीण जाता आनी परिणाम म्हणल्यार दुचाकीवाले घोऽऽ जातात आनी चारचाकींक पोंदच्यान मार बसता. हे रस्ते पळेल्यार सरकारान दुचाकी चलोवप्यांक चिलखताची सक्ती केल्यार बरी काय दिसता.
म्हाका दिशिल्लें अंदूं वर्सा आमकां पावसांत कसलोच त्रास जावचो ना. बरें सुळसुळीत रस्त्यां वेल्यान भोंवक मेळटलें. कारण खूब वर्सां उपरांत फाटींच आमचे रस्ते बरे हॉटमिक्स बी घालून नटयिल्ले. रस्त्या कुशिच्यो खळयोय निवळ करून उदकाक वाट केल्ली. पूण जेन्ना खंयचोय रस्तो हॉटमिक्स करतात तेन्ना मनांत एक दुबावसो येता, हो रस्तो उरतलो मूं? काय आनीक कसलें विकासाचें काम बी येतलें आनी रस्तो फोडटले? अशें मनांत येवपाचें कारण म्हणल्यार आयज रस्तो जाता आनी दुसरेच दिसा तो फोडटात. केन्ना उदका पायप फुटलें म्हणून तर केन्ना केबल घालूंक. केन्ना कोणाक कनेक्शन दिवपाक तर केन्ना आनी कसल्या तरी कारणाक लागून. दर फावटी हें अशेंच चल्लां. फक्त पयशांची नासाडी. काँट्रेक्टरांची तितली जोड, जनतेक कसलोच लाव ना.
तर हांगचे रस्ते हॉटमिक्स जाले आनी कांय दिसां भितरूच आमचो दुबाव खरो थारलो. विकासाच्या नांवान रस्ते फोडूंक सुरवात जाली. आनी फोडले तरी कशे? पळोवपाचे न्ही रे बाबा. रस्त्याचे एकेवटेन लायटीची केबल जाल्यार दुसरे वटेन गॅस पायप लायन. मदल्यान दुचाकी वचपा इतलोच रस्तो उरला आनी तोय बी पोकलीन चलोवन सामको खडबडीत करून उडयला. हें उणें म्हणून केबल, पायप एकेवटेंतल्यान दुसरे वाटेंत व्हरूंक रस्तो मदल्यान फोडला. ह्या रस्त्यान गाडी चलोवप म्हणल्यार एक व्हड संकश्ट. पूण हांगा रावतल्यांक आनीक उपाय ना. सर्कस करीत गाडयो चलोवपाच्यो. पावस आयलो आनी हातूंत भरिल्ली माती नाच जाली. जेन्ना रस्ते फोडटात तेन्नाच ते परत डांबर बी घालून सारके कित्याक करिनात काय? गोंयांत पावस कसो येता आनी कितलो पडटा तें खबर आसा न्ही सगल्यांक. मागीर पंदरा तारखे पयलीं रस्ते सारके करूंक जाय म्हणपाचें सरकार कित्याक सांगिना तर? गाडयेकारां कडल्यान रोड टॅक्स घेतात तेन्ना सारके रस्ते दिवपाची जापसालदारकी घेवं नाका?
पयल्याच पावसाक सगले कडेन उदक सांठलें. रस्त्या वेल्यान व्हाळ व्हांवक लागले. लोकांच्या घरांनी उदक पावलें. हातूंत तसो पावसाचो कांयच दोश ना. आमी जेन्ना रस्त्या कुशीकचीं शेतां पुरोवन उडयतात, सगले कडेन काँक्रीट जंगलां उबारतात तेन्ना उदक वतलें खंय? उदक थारपाक इल्लो तरी जागो जाय न्ही? आमी जर जागोच दवरलो ना, सगलीं शेतां, सकले जागे पुरोवन उडयले तर उदकान खंय वचपाचें? उदक एकतर रस्त्यार येतलें वा लोकांच्या घरांनी सरतलें.
आमचो विकास कसो जाला तें दर वर्सा येवपी पावस आमकां दाखोवन दिता. आमी रस्ते गुळगुळीत करतात, कुशीक खळयो बांदतात, ताचेरूच फुटपाथ बांदतात आनी पावस येतकूच कळटा हें सगलें व्यर्थ. पावसाचें उदक फक्त रस्त्या वेल्यान व्हांवना जाल्यार नगराक हुंवार हाडटा. आनी परिणाम रस्ते व्हांवन वतात. आतां कोणूय म्हणत विकासाचो आनी हुंवाराचो संबंध आसा व्हय? ‘हय आसा’ अशीच जाप दिवची पडटली. गोंयांत पयलीं सावन इतलोच पावस पडटा. मागीर पयलीं येवंक नाशिल्लो हुंवार आतांच कसो येता? कारण आयज आमी विकास केला. रस्त्या कुशिकचीं शेतां, भाटां पुरोवन इमारती उब्यो केल्यात, सगले फुटपाथ, आंगणां सुंदरीकरणाच्या नांवान पेव्हर्सांनी सजयल्यात. जें उदक पयलीं कांय वाठारांनी रावून जमनींत जिरतालें तें आतां कशें जिरतलें? खंय वतलें हें उदक? म्हणटकूच ताका रस्त्या वेल्यान व्हांवचें पडलें ना? आमचो विकास म्हणल्यार दोंगर तासप, शेतां पुरोवप आनी इमारती उब्यो करप. आनी हें करचे खातीर बायपास आनी रिंगरोड बांदप. मागीर आनी कितें जावपाचें, सांगात?

अभयकुमार वेलींगकार
9423884687