भांगरभूंय | प्रतिनिधी
शिंपणावळीचे नदरेन पावसाच्या हंगामाक खूब म्हत्व आसा. भात वा तांदूळ जें भारतीय उपखंडांत तयार जावपी एक मुखेल पीक आसा तें पुरायपणान पावसाच्या उदकाचेर आदारून आसता. जून- जुलय म्हयन्यांत पेरतात आनी नोव्हेंबर- डिसेंबरांत उत्पन्न काडटात. शेतांत उदकाची खाशेली पातळी सांबाळची पडटा. अशे तरेन पावसाच्या हंगामाचो भाताचे लागवडींत म्हत्वाचो वांटो आसता. उपखंडांतल्या लाखांनी शेतवडीचेर आदारिल्ल्या घरांचें नशीब पावस थारायता.
दुसरे वटेन सैमीक उदका संपत्तीची पातळी तिगोवन दवरपा खातीर पावसाचो हंगामूय गरजेचो. तळीं, भूंयगत उदक, हंगामी व्हाळ, न्हंयो… हीं सगळीं उश्ण गिमाच्या दिसांनी सुकतात आनी फकत पावसाळ्यांतच जितीं जातात. पावसाचो हंगाम धर्तरेक थंड करता आनी येवपी खर हवामानाच्या हंगामा खातीर ताचीं साधनां भरून काडटा.
पावसाचो हंगाम खूब म्हत्वाचो, जो जिवीत चक्र चालू उरपाक गरजेचो. भूंयगत उदकाचो सांठो भरपा खातीर आनी शेतवडी खातीरय तो खूब म्हत्वाचो. भारता सारक्या शेतवडीचेर आदारिल्ले अर्थवेवस्थेचे देश पावसाच्या दिसांनी पिकां आनी भाजीपालो उत्पादनां खातीर खूब आदारून आसतात. तशेंच हो संवसारांतलो सगळ्यांत चड आवडीचो हंगाम. भुरगीं, तरणाटे आनी व्हडले सगळ्यांक तातूंतल्यान उक्ती जावपी सैमाचे शुद्ध सोबीतकायेक लागून ताचो मोग आसा.
पुजल प्रकाश नागवेंकार
8378862298
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
