भांगरभूंय | प्रतिनिधी
पावसाच्या दिसांनी जायतीं दुयेंसां पातळटात. हातूंत बुरशीच्या संसर्गाक लागून जावपी स्वास घेवपाच्या दुयेंसांचोय आस्पाव जाता. दमो आनी ब्राँकायटीसाचे दुयेंती वाडत आसात. हवेंतल्या परागकण, धुल्ल आनी ओलसाणीक लागून ॲलर्जीची समस्या निर्माण जाता. अशी ॲलर्जी आशिल्ल्या मनशाक दमो, ब्राँकायटीस, ॲलर्जी राईनाइटिस जावपाचो चड धोको आसता.
एलर्जीचे प्रकार
बुरशीक लागून जावपी ॲलर्जी: हवेंतली आर्द्रताय आनी ओलसाण आशिल्ल्यान बाथरूम आनी रांदचे कुडींत बुरशी वाडूंक शकता. शिंक येवप, खोंकली येवप, दोळ्यांतल्यान उदक येवप आनी स्वासाचो त्रास जावप हीं लक्षणां दिसतात.
धुल्लकण: खाज येवप, काळाजात जळजळ जावप, कातीचेर फोड येवप हीं लक्षणां दिसून येतात.
परागकण: हाका लागून एलर्जी जाता आनी नाक बंद जावप, गळ्यांत खाज येवप आनी दोळ्यांतल्यान उदक येवप हीं लक्षणां दिसतात.
ॲलर्जीचें निदानः स्पायरोमेट्री (फुफ्फुसाच्या कार्याची चांचणी) आनी ब्रोन्कोप्रोव्होकेशन चांचणी, एक्स-रे, शारिरीक तपासणी आनी रगताची तपासणी करून ॲलर्जीचें निदान करुं येता.
उपचार: ही स्थिती वेवस्थापन करपाक तज्ञ दोतोराच्या सल्ल्या प्रमाण वखदां घेवचीं पडटली. स्वताचे मर्जेन वखदां घेवप धोक्याचे थारूंक शकता. पावसाच्या दिसांनी ॲलर्जीचो धोको टाळपा खातीर सकयल दिल्ले प्रतिबंधात्मक उपाय पाळचे.
० घराची नेमान नितळसाण केल्यार ॲलर्जीची समस्या टाळूंक मेळटा. घरांत हवामान बरो आसा हाची खात्री करात आनी बुरशी वाडची न्हय म्हूण ह्युमिडिफायर वापरात. घर निवळ आनी एलर्जी मुक्त दवरपाक आनी घरांत धुल्ल जमचो न्हय म्हणून हेपा फिल्टर सयत व्हॅक्यूम क्लीनर निवडून नेमान व्हॅक्यूम करचें आनी घरांत धूल्ल एकठांय जावपाक दिवं नाकात.
० बुरशी लागण जावची न्हय म्हूण बाथरूम, रांदचीकूड आनी तळघरांतली ओलसाण ना करची. घरांतल्या लांकडी फर्निचरांत, वणतींनी ओलसाण उरची ना हाची खात्री करात.
० घरगुती वनस्पतीं बुरशी आनी परागकणांचे कारण थारुंक शकता. वेळावेळार त्यो निवळ करात आनी उदक नेमान बदलतात. वारंवार हात धुवन आनी निवळ कपडे घालून वैयक्तीक नितळसाण दवरात, जाका लागून एलर्जीची शक्यताय उणी जाता. घरांतल्या पाळीव प्राण्यांकय एलर्जी जावंक शकता हें लक्षांत दवरात.
० थंडी, खोंकली, शिंकप सारकिल्लीं लक्षणां वेवस्थापन करपा खातीर तज्ञ दोतोराचो सल्लो घेवचो. अँटीहिस्टामाइन्स, डिकंजेस्टंट्स आनी नाकांतले कॉर्टिकोस्टिरॉईड्स ॲलर्जी वेवस्थापन करपाक मदत करतात.
० समतोल आहार आनी कुडीक हायड्रेटेड दवरल्यार रोगप्रतिकार शक्त वाडटा
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
