भांगरभूंय | प्रतिनिधी
गोंयची राजधानी पणजेची अवस्था सद्या थकिल्ल्या म्हातारे सारकीं जाल्यां. स्मार्ट सिटी (‘स्मार्ट गोंदळ’) ह्या नांवान फाटल्या पांच म्हयन्यां सावन पणजी शारांत खणून दवरलां. ह्या शारांत रस्त्यांचेर बुलडोझर चलोवन तो छिन्नविच्छिन्न केल्लो ना, असो एकूय रस्तो ना. सात वर्सां आदीं केंद्र सरकारा कडल्यान पणजी स्मार्ट सिटी करपाक कोट्यांननी रुपयांचो निधी आयिल्लो. पणजी म्हापालिका आनी संबंदीत सरकारी खातें सात वर्सा न्हिदिल्लें. आतां हो निधी परत केंद्राक वच्चो न्हय म्हणून उरिल्ल्या सात म्हयन्यांत हो प्रकल्प पुराय केल्ल्यांची बिलां सादर करपाक जाय. हे खातीर रस्ते खणपाची मोहीम सामकी नेटान चालू आसा.
पणजे राजधानीच्या रस्त्यां खातीर एक म्हण याद जाता ‘यहां खुदा है! वहां खुदा है! जहां खुदा नहीं, वहां कल खुदेगा!’ पणजीकारांक आतां कांय म्हयने गैरसोय सोंसची पडटली. ते उपरांत 15 वर्सां पणजेंत एकूय खणकाम जावचें ना अशें पणजेचो नगराध्यक्ष रोहित मोन्सेरात हांणी आश्वासन दिलां. पूण, जावपी कामांचो दर्जो पळयल्यार फुडल्या 15 म्हयन्यांत स्मार्ट सिटीचे तीनतेरा वाजतले, अशें म्हाका तरी दिसता. पणजे सावन दोनापावला मेरेनचो शिमिटाचो रस्तो उण्यांत उणो कांय वर्सां मेरेन दुरुस्त जावचो ना, अशें सांगिल्लें. हो रस्तो फकत स म्हयन्यांत मोडलो. अटल सेतूचेर लेगीत हीच अवतिकाय जाल्या. पणजेचे सामान्य नागरीक धुल्ल, धुंवर आनी आवाज प्रदुशणाचो त्रास सोंसता. इतलें त्रास सोंसून पावसाच्या दिसांनी कसलें भिरांकूळ संकश्ट सोंसचें पडटलें हांची धाकधूक तांकां आसा. अशे परिस्थितींत पणजेचे तीस नगरसेवक जनतेक आदार दिवचे बदला लिपून बशिल्ल्याचें जाणवता.
अजून उजो पेट्टा
सत्तरी म्हादय अभयारण्यांत उजो लागून आयज 20 दीस जाले आसतले. अजूनय उजो नियंत्रणांत येवंक ना अशें दिसता. साट्रेगड, मोर्लेगड, वाघेरी दोंगर ह्या सुवातींनी लागिल्लो उजो पालोवपाक गोंय उजो पालोवपी दळाक अपेस आयलें. पयसुल्ल्या वाठारांनी वाहन व्हरपाक रस्ते नाशिल्ल्यान आनी आपत्ती वेवस्थापन खात्या कडे उजो पालोवपाचीं उपकरणां नाशिल्ल्यान उजो आनीक पातळ्ळो. अशे परिस्थितींत गोंयचे रान खाते आत्यंतीक जावन पळोवपाच्या भुमिकेंत दिसलें.
रानमंत्री विश्वजीत राणे हांणी सत्तरीत लागिल्लो उजो तेच तरेन पळयलो. रान मंत्री म्हूण तांणी जीं ताकतिकेचें पावलां उबारपाची अपेक्षा आशिल्ली तशीं पावलां उबारल्यांत, अशें दिसूंक ना. जैवविविधताय आशिल्ल्या म्हादाय अभयारण्यांतलो उजो हो प्रत्यक्षांत गोंयचे गिरेस्त रानसंपत्तीचेर केल्लो हल्लो. आमच्या पूर्वजांनी शेंकड्यांनी वर्सां सांबाळून दवरिल्लीं रानां आनी सैम देवता उज्यांन नश्ट जाली. खूब दुर्मीळ वनस्पत, वखदीं वनस्पत, रानवटी जनावरां ह्या उज्याक लागून नश्ट जाल्यात. ह्या उज्याच्या हुंवाराक लागून कितले कोटी अर्थीक लुकसाण जालां हाचो अजून अदमास ना. रानमंत्री नव्या प्रकल्पांचें उक्तावण करपाक व्यस्त आसात. उज्याचो हुंवार आतां गोंयभर पातळ्ळा. रानां जळोवपी वायट प्रवृत्ती ह्या राज्यांत जल्माक आयल्यात. फकत देवान ह्या बकासुरांक बुद्द दिवची, अशें मागणें करचें पडटलें.
गजानन बा. नायक भाटकार
शिवकृपा, आल्त पर्वरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
