भांगरभूंय | प्रतिनिधी
पावस जून ते सप्टेंबर असो चार म्हयने आसता. बरेच लोक ह्या दिसांनी सत्री घेनासतना भोंवतात. दरेकल्यान सत्री, रेनकोट वांगडा बाळगप बरें.
रिमझीम पावसांत भिजपाक सगल्यांक आवडटा. पावस सैम आनी मनशां मदीं नवी उमेद हाडटा. उदक सांठिल्ले पळोवन थोड्यांक त्या उदकांतल्यान चलत वच्चेंशें दिसता. थंडगार वाऱ्याचें धाकटुलें ल्हार मन प्रसन्न करता.
पावसाच्या दिसांनी आहार- विहारांत फावो तसो बदल करचो पडटा. भलायकेची जतनाय घेवप चड गरजेचें. नाजाल्यार मानसीक, शारिरीक दुखणीं जातात. पावसा दिसांनी आमची कूड, मन निरोगी आसप खरेंच बरें. पयलें म्हणल्यार उक्त्यार रांदिल्लें, फुटपाथाचेर तयार केल्ले जीनस खावचे न्हय. हे जीनस, कापिल्लीं फळां देखीक पणसाचे गरे, काळींग बी. ह्या फळांनी जंतुचो संसर्ग जाता. ताचेर मुसकां बसतात. जोर, ओंकारी, पातळ संडास जाता. भलायकी इबाडटा.
पावसांत खतखतीत तापिल्लें, फिल्टर केल्लें उदक पियोवप बरें. थंड उदक, थंड पेय सहसा पियेवचें न्हय. बुरशें उदक पियेल्यार स्वासाचीं, पोटाचीं दुयेंसां जावपाची भिरांत आसता. हून उदकाची बाटली सदांच आपले वांगडा घेवपाक विसरूं नाकात. जांकां पावसांत अर्जीर्ण, खोंकली, थंडी जाता तांणी एक लीटर दुगदुगीत उदकांत पांच कुलेरां सुंठ पावडर घालून तान लागता तेन्ना तें उदक घोट- घोट पियेवचें.
पावसांत जळारी, ल्हान मुसकांची पैदास जाता. डेंग्यू, मलेरिया सारकीं दुयेंसा जातात. जोर येता. उक्त्यार उदक सांठून रावप, घरा भोंवतणी तळें जावप योग्य न्हय. ताका लागून जळारां वाडपाची, मुस, किटकांची पैदास वाडटा. घरांतलीं आयदनां, टांकयो सदांच धांपून दवरच्यो. नाजाल्यार तातूं त जळारां तांतयां घालतलीं.
तिनसांजचो धूप घालप बरें. नाल्लाचे पेटिल्ले कट्टेचेर धूप, कापूर, ओवों, कोडू लिंबाचीं, करबिलाचीं पानां, हरयाळी पसून केल्लो धुंवर जळारां मारपाक सामको बरो. पावसांत थंडी जावप, नाक व्हांवप, शिंको येवप हे खातीर गंजन, तुळशीचीं केसरां, पुदिना हांचो कसाय घेवप बरो. आतां फार्मासींनी रेडिमेड कसाय (काढा) मेळटा. थोडो कांदो कापून कसायांत घाल्यार बरो.
पावस जून ते सप्टेंबर असो चार म्हयने आसता. बरेच लोक ह्या दिसांनी सत्री घेनासतना भोंवतात. दरेकल्यान सत्री, रेनकोट वांगडा बाळगप बरें. पावसांत भिजल्यार सगल्यांत पयलीं तकली सारकी पुसपाक जाय. ओले कपडे रोखडेच बदलूंक जाय. कामाक वचपी लोकांनी एक जोडी कपडे वांगडा घेवंक जाय वा आॅफिसांत दवरूंक जाय. ओल्या कपड्यांनी एसींत बसप योग्य न्हय. वांगडा ल्हान तुवालो, नॅपकीन आसपाक जाय. जेवणाच्या वेळार अन्न गरम करून जेवचें. आतां कांय आॅफिसांनी ती सुविधा आसता. थंडगार जेवचें न्हय. पावसांत थंड उदक पियेवचें न्हय. तें अशुद्ध आसल्यार डायेरिया, मोडशेक आमंतण दिवपा सारकें. तशें जाल्यार ओआरएस सोल्युशन पिवप गरजेचें. नाजाल्यार हुनहुनीत उदक थंड करून तातूंत चिमटीभर मीठ आनी लिंबू पिळप. हें घरचे घरा केल्लें ओआरएस. संडास जाता तशें परत परत उदक पियेवप.
पावसाच्या दिसांनी भलायकेची जतनाय घेवपाक जाय. ती घेतली जाल्यार दुयेंसां पयस उरतात.
– सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
