भांगरभूंय | प्रतिनिधी
भांगरभूंय | प्रतिनिधी
पणजी : फाटलो म्हयनोभर पावसाचेर सांवार आयिल्लो. ह्या सेगीत पडपी पावसाक लागून गोंयांतूच न्हय जाल्यार गोंयच्या आशिकुशीच्या राज्यांकूय बरोच फटको बसला. जायते कडेन पालसणां कोसळप, न्हंयांक हुंवार येवप, रस्ते उदका पोंदा वचप, झाडां पडप, लोकांच्या घरांनी उदक भितर सरप, घरांचेर झाडां पडून तशेंच वणटी कोसळून लुकसाण जावप अश्यो जायत्यो घडणुको घडल्यो. ताचे उपरांत दोन दीस पावसान विसव घेतलो. पावसान घेतिल्ल्या सुसेगाक लागून हवामान खात्यान येलो अलर्टूय दिल्लो. मात बुधवारा रातच्यान पावसाचेर परत सांवार आयला. घोग्यांनी पडपी पावसाक लागून जायत्या सुवातांचेर हुंवाराची परिस्थती निर्माण जाल्या. गोंयचे रस्ते, पूल उदका पोंदा गेल्यात. ताका लागून लोकजीण विस्कळीत जाल्या.
दिवचले धुमशेण
दिवचले म्हालांत बिरेस्तारा सकाळीं उटंगाराच्या पावसान धुमशेण कांडलें. सगळ्यो न्हंयो आनी कानाल हुंवारान उपाट भरून व्हावूंक लागले. दिवचले न्हंयेच्या उदकाची पातळी वाडिल्ल्यान पुराय वाठारांत हुंवाराची परिस्थिती निर्माण जाली. जायते रस्ते उदका पोंदा गेले. हाचो परिणाम येरादारीचेरूय जालो. जायत्या गांवाचो संपर्क तुटलो. साळ- शापोरा पूल उदका पोंदा गेले. जायत्या घरांनी उदक भितर सरलें. दनपार म्हणसर दिवचले बाजारांतल्या दुकानांनी उदक भरलें.
दिवचलेचे आमदार डॉ. चंद्रकांत शेट्ये हांणी दिवचलचे परिस्थितीचो नियाळ घेतलो. उपजिल्लोधिकारी, मामलेदार हांचे सयत वेगवेगळ्या वाठारांची तांणी पळोवणी केली. तशेंच हुंवारांत लुकसाण जाल्ल्या वाठारांक गरजेची मजत करपाचें आस्वासन तांणी दिलें. फुडाराक अशो घडणुको जावच्यो न्हय म्हणून गरजेचे उपाय करपाक उंचेल्या पांवड्या वयली बसका घेवन गरजेची तरतूद करपाक निश्चीत धोरणाची येवजण करपाची गरज आसा, अशें स्पश्ट केलें.
केरी सत्तरीचे व्हाळवाट न्हंयेक हुंवार आयला. ताका लागून घोटेलीचो पूल उदका पोंदा गेलो. ताका लागून सुमार तीन वरां येरादारी बंद उरिल्ली. आतां मेरेन तीन खेपे हो पूल उदका पोंदा गेला. घोटेलीच्या तीन घरांनी उदक घुशिल्ल्यान घरधनयांचें लुकसाण जालें.
फाटल्या आठ दिसांच्यान पावसान सांवार कांडलां. ताका लगून धरणांत व्हड प्रमाणार उदक सांठलां. खबरदारीचे उपाय म्हूण परतून एकदां अंजुणें धरणाचीं चारूय दारां उक्तीं केल्यांत. ताका लागून व्हाळवाट न्हंयेची पातळी एकसारकी वाडत आसा. सांखळे पंपींग करून उदकाची पातळी उणी करपाचो यत्न चल्ला.
शापोरा न्हंयेच्या उदकाची पातळी वाडिल्ल्यान कामुर्ली वाठारांतलो रस्तो उदका पोंदा गेला. तार कामुर्लीच्या कांय घरांनी आनी दुकानांनी उदक घुसलां. उदकाची पातळी वाडिल्ल्यान तुयें- कामुर्ली फेरी सेवा बंद दवरिल्ली.
मजगतीं, जिल्लोधिकारी स्नेहा गीते हांणी उपजिल्लोधिकारी कबीर शिरगांवकार हांचे सयत मयते- अस्नोड्यां भेट दिवन हुंवाराची पळोवणी केली.
1 जून ते १ ऑगस्ट ह्या काळांत वाळपय 151.51 इंच पावसाची नोंद जाल्या. फाटल्या 24 वरांत राज्यांत सरासरी 5.33 इंच पावसाची नोंद जाल्या. तशेंच केप्यां 7.87 इंच पवासाची नोंद जाल्या. आतां मेरेन 121.71 इंच पावसाची नोंद जाल्या. सरासरी परस 55.1 टक्के चड पावस पडिल्ल्याची हवामान खात्यान दिली म्हायती.
गोंयां भायल्याय राज्यांनी पावसाचो सांवार
बिरेस्तारा सकाळीं भेडशी पुलाच्या जोड रस्त्यार हुंवार्या उदकांत आडकून उरिल्ल्या चवगांक दोडामार्ग पुलिसांनी वाटयले. भेडशी जोड रस्त्यार अचकीत उदक आयिल्ल्यान दोन चारचाकी गाडयो उदकांत आडकल्ल्याची म्हायती पुलिसांक मेळ्ळी. पुलिसांनी घडणुके सुवातेर वचून आडकल्ल्यांक वाटयले. भेडशी दोडामार्गार उटंगाराच्या पावसाक लागून उदक रस्त्याचेर आयिल्ल्यान साबार गाडयो उदका पोंदा गेल्यांत.
तिळारी धरणाच्या वेवस्थापना कडल्यान आयिल्ले म्हायती प्रमाण, फाटल्या 24 वरांनी तिळारी वट्ट 221 मिमी पावसाची नोंद जाल्या. सध्या पावसाचेर सांवार आयिल्ल्यान न्हंयो, व्हाळ अश्या सुवातांचेर अचकीत उदकाचो विसर्ग वाडपाक शकता. गरज आसल्यारूच घरा भायर सरचे ना तर घरांतूच रावपाचो उलो तिळारीचे कार्यकारी अभियंते विनायक जाधव हांणी मारला. तशेंच तिळारी न्हंयेंतल्यान व्हांवपी उदकांतूय नेटान वाड जायत आसा. तिळारी न्हंय धोक्याची पातळी हुपपाची शक्यताय आसा. लोकांक सादूर रावपाची शिटकावणीय तांणी दिल्या.
संकश्टांत सांपडल्यार संपर्क करात
उटंगाराच्या पावसाक लागून निर्माण जाल्ली आपत्कालीन स्थितींत मजती खातीर 0832- 2419550/ 0832- 2225383/ 0832- 27941000 ह्या नंबराचेर संपर्क करपाचो उलो प्रशासनान मारला.
म्हत्वाच्यो घडणुको
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
