भांगरभूंय | प्रतिनिधी
शॅकां सुरू करपाक मेळना
वॉटरस्पोर्टस ऑपरेटरांक लुकसाण
40 ते 45 टक्के शेतांचें लुकसाण
भांगरभूंय । प्रतिनिधी
पणजी : शेती, बागायती उपरांत पावसाचो पर्यटन वेवसायाक लेगीत मार बसला. पर्यटक आसून लेगीत शॅकां सुरू करप शॅक धनयांक शक्य जायना. तशेंच वॉटरस्पोर्टस बोटी लेगीत पावसाक लागून न्हंयेंत घालपाक मेळना. शॅक तशेंच वॉटरस्पोर्टस ऑपरेटरांक जाल्ले लुकसाणेची सरकाराक कल्पना आसा. फावो त्या प्रमाणांत मजत करपाचे सरकाराचे यत्न आसात, अशें पर्यटन मंत्री रोहन खंवटे हांणी सांगलें.
आडवेळ्या पावसाक लागून शेतांचें खुबूच लुकसाण जालां. 40 ते 45 टक्के शेतांचें लुकसाण जालां, असो मुळावो अदमास आसा. पळोवणी पुराय जाले उपरांत लुकसाणेचें प्रमाण कळटलें, अशें शेतकी संचालक संदीप फळदेसाय हांणी सांगलां. शेती, बागायती उपरांत आतां पर्यटनाचें लेगीत लुकसाण जावपाक लागलां.
सप्टेंबर सोंपल्या उपरांत पर्यटन मोसम सुरू जाता. पर्यटक येवपाक लागल्यात. पोरूंचे तुळेंत अंदूं पर्यटक चड आयल्यात. मात हाचो लाव पर्यटन वेवसायिकांक जायना. सरकारान अंदूं शॅकांक परवाने दिवपाची प्रक्रिया बेगीन सुरू केल्ली. मात पावसाक लागून शॅक सुरू करपाक आडखळी येतात. वॉटरस्पोर्टस ऑपरेटरांची लेगीत हीच गजाल आसा. पावसाक लागून तांकां बोटी उदकांत व्हरपाक मेळनात. हाका लागून बोटी तश्योच नांगरून दवरच्यो पडटात.
ओशियनमॅन इव्हेंटाक आयपीएस अधिकारी जापसालदार
करंझाळे वाठारांत ओशियनमॅन इव्हेंट जावपाक आयपीएस अधिकाऱ्याचो बेजापसालदारपणा कारण आसा. आयपीएस अधिकाऱ्यांनी पयली गोंय समजून घेवचें. गोंयकारांच्यो भावना समजून घेतले उपरांत गोंय समजप शक्य जातलें, अशें पर्यटन मंत्री खंवटे हांणी सांगलें. ओशियनमॅन इव्हेंट आयोजकांनी पर्यटन खात्याची मान्यताय घेवंक ना. आयपीएस अधिकाऱ्यान मान्यताय दिल्ल्यान ह्या इव्हेंटाक सुरवात जाली. पर्यटन खात्यान 50 हजारांचो दंड घातला. करंझाळे वाठारांत रापणकार परंपरीक पद्दतीन नुस्तेमारी करतात. नुस्तेमारी जाता, त्या थळाचेर ओशियनमॅन सारको इव्हेंट जावपाक शकना. पर्यटन खातें नुस्तेमारांक आडखळ थारपी कार्यावळीक मान्यताय दिवचें ना. फक्त एका आयपीएस अधिकाऱ्याच्या आदेशाक लागून ओशियनमॅन इव्हेंट सुरू जालो. हो इव्हेंट बंद करचो पडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
