पावसाचो नेट वाडलो

भांगरभूंय | प्रतिनिधी

गोंयभर पडझडीच्यो घडणुको

भांगरभूंय । प्रतिनिधी

पणजी : अरबी दर्यांत तयार जाल्लो उण्या दाबाचो पट्टो तशेंच हेर वातावरणीय कारणांक लागून शेनवारा गोंयांत वादळी वाऱ्या सयत पावसान नेटाची हाजेरी लायली. गोंयांत खूबश्या वाठारांनी झाडां पडून लुकसाणीच्यो घडणुको घडल्यो. पणजे चर्च व्ह्यू इमारती लागसार पालसाण कोसळिल्ल्यान थंयच्या घरांचें किरकोळ लुकसाण जालें. ही घडणूक फांतोडेर 2.30 वरांच्या सुमाराक घडली. वादळी वाऱ्याक लागून श्यामाप्रसाद मुखर्जी स्टेडियमाचेर उबारिल्ली सजावट कोसळून पडली. पावसाक लागून कांय कडेन भातशेतीचें लुकसाण जालें.

शेनवारा फांतोडे सावनूच पावसाक सुरवात जाली. पणजे सकाळीं 10 वरां मेरेन पावस चालू आशिल्लो. दनपारां उपरांत अदीं मदीं नेटाच्यो दडको आयल्यो. एकसारको पडिल्ल्या पावसाक लागून शारांतले कांय रस्ते उदका पोंदां गेले. हवामान खात्यान गोंयांत 25 ते 28 ऑक्टोबर मेरेन वादळी वाऱ्या सयत पावसाची शक्यताय उक्तायल्या. ते प्रमाण ह्या चार दिसां खातीर पावसाचो यलो अलर्ट जारी केला. तशेंच 29 ते 31 ऑक्टोबर ह्या काळांत तुरळक स्वरुपांतल्या पावसाची शक्यताय उक्तायल्या.

गोंयांत शेनवारा सकाळीं 8.30 वरां मेरेन सरासरी 3 इंच पावसाची नोंद जाली. ही ऑक्टोबरांतली सगल्यांत चड पावसाची नोंद थारली. वयल्या काळांत काणकोणां 5.60 इंच, मुरगांवां 4.12 इंच पावस पडलो. गोंयांत 1 ते 25 ऑक्टोबर ह्या काळांत सरासरी 7.30 इंच पावसाची नोंद जाल्या. 25 ते 28 ऑक्टोबर ह्या काळांत वाऱ्याचो वेग वराक 35 ते 55 किलोमिटर मेरेन पावपाची शक्यताय आसा. हे खातीर नुस्तें मारप्यांनी दर्यांत वच्चें न्हय, असो हवामान खात्यान उलो मारला.

पणजे सावन 380 किलोमिटरांचेर उण्या दाबाचो पट्टो

हवामान खात्यान दिल्ले म्हायती प्रमाण, अरबी दर्यांत तयार जाल्लो उण्या दाबाचो पट्टो पणजीच्या नैऋत्य दिशेक अरबी दर्यांत 380 किलोमिटर अंतराचेर आसा. हो पट्टो फुडल्या 24 वरांत वायव्य दिशेक सरकपाची शक्यताय आसा.