भांगरभूंय | प्रतिनिधी
भारत आनी पाकिस्तान ह्या पंगडां मदले लडतींत पावसाचो शेक पळोवपाक मेळ्ळो. भारताच्या डावा उपरांत नेटाचो पावस सुरू जालो आनी ताका लागून संपुर्क मैदान धांपचें पडलें. णव वरांचेर पावसान विसव घेतलो आनी मॅच अधिकाऱ्यांनी मैदानाची पळोवणी करपाक गेले. भारताच्या खेळगड्यांनी लेगीत वॉर्म अप करपाक मैदानांत देंवले. पाकिस्तानाक 36 ओव्हरींनी 226 धांवड्यांची सुरक्षीत मोख मेळ्ळी. पूण, पावसाचे हाजेरेक लागून मैदान परतून धांवचें पडलें. 10.27 हो कट ऑफ वेळ थारायलो आनी ते उपरांत मॅच 20 ओव्हरींची जातली आशिल्ली. पूण, ते आदींच मॅच रद्द जाली.
ही मॅच जिखून भारत आपल्या खात्यांत दोन गुणांची भर घालपाक इत्सूक आशिल्लो आनी सुपर चार गटाच्या लागसार लेगीत पावतलो आशिल्लो. पूण, मॅच रद्द करची पडिल्ल्यान पाकिस्तानाक एक गूण फावो जालो. ताचे आतां वट्ट तीन गूण जाल्यात. ताणें आपले पयले मॅचींत नेपाळा आड 238 धांवड्यांनी व्हड जैत मेळयलां. ताची सुपर चारांतली सुवात लागींलागीं निश्चीत जाल्या. भारत आपली फुडली मॅच फाल्यां नेपाळा आड खेळटलो आनी हवामान खात्या प्रमाण ते मॅचीचेर लेगीत पावसाचें सांवट आसा.
ते आदीं भारताचो मुखेली रोहित शर्मान टॉस जिखून पयलीं बॅटींग करपाचो निर्णय घेतलो. भारताक 50 ओव्हरी लेगीत खेळपाक जमल्यो ना. 48.5 ओव्हरींनी ताचो डाव 266 धांवड्यांचेर सोंपलो.
भारता वतीन इशान किशन आनी हार्दिक पांड्या हांणी उत्कृश्ट खेळी केली. हार्दिकान सगल्यांत चड 87 धांवड्यो केल्यो. इशान किशनान 82 धांवड्यांची खेळी केली. ह्या दोगां खेरीत भारताच्या एकाय बॅट्समनाक 20चो आंकडो हुपपाक जमलो ना. हार्दिक आनी इशान हांच्या उपरांत सगल्यांत चड धांवड्यो फास्ट बॉलर जसप्रीत बुमरान केल्यो. अखेरच्या ओव्हरींनी आक्रमक बॅटींग करून 16 धांवड्यो केल्यो.
पाकिस्ताना वतीन शाहीन आफ्रिदीन 10 ओव्हरींनी 35 धांवड्यो दिवन 4 विकेटी घेतल्यो. नसीम शाह आनी हॅरीस सौफ हाणें दरेकी तीन विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
