भांगरभूंय | प्रतिनिधी
पणजी : शेनवारा रातीं उसरां सुरू जाल्ल्या पावसाचेर आयतारा सकाळ सावन सांवार कांडलो. उटंगाराच्या पावसाक लागून गोंयच्या खुबश्या वाठारांत उदक सांठून उरिल्लें. रस्ते मुंगरले, पालसणां, झाडां कोसळ्ळीं. जाल्यार गोंयचीं मुखेल धरणांय भरलीं. ताका लागून पुराय लोकजीण विस्कळ्ळ्या.
गोंयचीं साळावले , पंचवाडी आनी गवाणे हीं तीन धरणां आयज सकाळ सावन भरून व्हांवतात. साळावलेचें धरण काल सांजेवेळार ओव्हरफ्लो जालें. जाल्यार पंचवाडी आनी गवाणे आयज. आंकडेवारी प्रमाण साळावले १०४ टक्के, जाल्यार पंचवाडी धरणांत १०२ टक्के आनी गवाणे धरणांत १०० टक्के उदक भरलां. आमठाणे ५८ टक्के, चापोली ७७ टक्के, अंजुणें ५७ टक्के, तिळारी ६१ टक्के उदकाचो सांठो आसा.
मजगतीं, तिळारीच्यान १७२ क्युसेक उदक सोडलां. उत्तरेक सत्तरी, फोंडें, दिवचल, तिसवाडी, पेडणें जाल्यार दक्षिणेक केपें, सासष्टी, मुरगांव, काणकोण वाठारांनी घोंग्यानी पडिल्ल्या पावसाक लागून हुंवाराची स्थिती निर्माण जाल्या. मुखेलपणान फाटल्या २४ वरांनी गोंयांत सगळ्यांत चड पावस पडलो. १ जून ते ८ जुल सकाळ मेरेन गोंयांत ५७.६७ इंच पावसाची नोंद जाल्या. अंदूंचो सगळ्यांत चड पावस फाटल्या २४ वरांनी नोंद जाला. फकत पणजेंतूच फाटल्या २४ वरांनी १४.२० इंच पावस पडला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.