पावसाक लागून बंगळुरू इमारत कोसळ्ळी: पांच जाणांक मरण
भांगरभूंय | प्रतिनिधी
बंगळुरू, खबरां संस्था: बंगळुरू घोग्यांनी पडपी पावसाक लागून एक व्हड घडणूक घडली. बंगळुरू उदेंतांतल्या हन्नूर हांगा बांदकाम चालू आशिल्ली इमारत कोसळ्ळी. हे इमारतीच्या राशी पोंदाक चिड्डून पांच जाणांक़ मरण आयलें. जाल्यार जायते लोक आडकून पडिल्ल्याचो अदमास आसा. आतां मेरेन १३ जाणांक सुरक्षीतपणान राशी पोंदच्यान भायर काडल्यात. आनीक सात जाण बेपत्ता आसात. वाटयल्ल्यां मदले पांच जाण गंभीर जखमी जाल्यात अशें सांगतात. मजगतीं, हे घडणुकेचो सीसीटीव्ही व्हिडियो व्हायरल जाला.
मंगळारा (२२ ऑक्टोबर) सांजवेळार इमारत कोसळ्ळे उपरांत उजो पालोवपी दळ आनी आपत्कालीन खात्यान वाटोवपाचें काम सुरू केलें. पुलीस आनी थळाव्या नागरिकांच्या आदारान रेस्न्यू ऑपरेशन चालू आसा.
हे इमारतींत टायल्स पुरवण करपी अहमद हांणी सांगलें, इमारतींत सुमार २० कामगार टायल्स, कॉंक्रीट आनी प्लंबिंगाचें काम करतात. इमारतीची बुन्याद तयार जावंक नाशिल्ल्यान इमारत अचकीत कोसळ्ळी असो आरोप तांणी केलो.
पुलीस उपायुक्त डी. देवराज हांणी सांगलें, वट्ट तेरा लोकांक इमारतीचे राशी पोंदच्यान भायर काडले. मरण आयिल्ल्यांची वळख पटल्या. अरमान (२६), त्रिपाल (३५), मोहम्मद साहिल (१९) , सत्य राजू (२५) आनी शंकर ह्या पांच जाणांच्यो कुडी भायर काडल्यात. अरमान, त्रिपाल आनी साहिल हे बिहारच्यान आयिल्ल्याचें पुलिसांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
