पावसाक लागून पालसण कोसळ्ळें, घरांचें लुकसाण
भांगरभूंय | प्रतिनिधी
पणजी ः व्हड पावसाक लागून शेनवारा सकाळीं वास्कोच्या वाडे वाठारांत पालसण कोसळ्ळें. हाका लागून थंय रावपी दीपक गोसावी हांच्या घरा फाटल्यान चिखल आनी फातर व्हांवून आयलें. हाका लागून घराच्या फाटल्या भागाक लुकसाण जालें. सुदैवान हे घडणुकेंत कोणाक दुखापत जावंक ना.
घडणुके विशीं कळटाच, उजो पालोवपी दळ थंय पावले आनी सुरक्षेचे नदरेन मजतकार्य सुरू केलें. सुमार एक वर मेरेन मजतीचें काम चालूच आशिल्लें. ह्या वेळार थळावे आमदार कृष्ण साळकार हांणी थळाक भेट दिवन गोसावी कुटुंबाक मेळून बेगोबेग मजत करपाचें आश्वासन दिले.
वाडे वाठारांत दर वर्सा पालसणां कोसळटात. देखून ह्या वाठारा खातीर 9 कोटी रुपया खर्च करून राखणे वण्ट बांदपाचो प्रस्ताव तयार केला, आनी ताचेर बेगीन कारवाय जातली अशी म्हायती आमदार साळकार हांणी दिली. पालसण कोसळ्ळें उपरांत वाठारांत भंयाचें वातावरण निर्माण जालां आनी थळाव्या लोकांनी प्रशासना कडल्यान हाचेर उपाय करपाची मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
