भांगरभूंय | प्रतिनिधी
जून म्हयन्यांत दमट हवामान आशिल्लो पावस येता. मजगतीं, राज्यांतलें तापमान मात्शें सकयल वता, जाका लागून सगळे कडेन वोलसाण निर्माण जाता. जेवण सांठोवपाक खुबश्यो आडखळी येतात. ह्या आडखळीं वांगडा किडींचोय आसपाव आसता.
वतांत सुकयल्ले आंबे – आंबो विवीध खावपाच्या जिन्नसांनी वापरतात. तो सांठोवन दवरप सामकें सोपें. फकत आंबो वापरून आमकां लोणचेंय करूं येता. तशेंच आंब्या सयत लिंबू, गाजर आनी मसालो घालूनय रुचीक लोणचें करूं येता. जायते थळावे लोक ‘मांगाद’ नांवाच्या आंब्याचो जाम लेगीत तयार करतात. सुकयल्ल्या आंब्याची कडी, आमटाण, भाजी आनी हेर जायते जिन्नस करूं येतात. थोडे तोरां चिरून ताचीं सोलां करतात.
मिरसांगो – काणकोणच्या दोंगराळ वाठारांत (जीआय) भौगोलीक टॅग आशिल्ल्या ‘खोला’ नांवाच्या मिरसांगांची लागवड करतात. ह्यो मिरसांगो वतांत सुकयतात आनी उपरांत ताचो मिरसांगां पिठो करूं येता. उपरांत हो मिरसांगे पिठो तुमी तुमच्या जेवणांत वापरपाक शकतात.
भिण्णां – गोंयचे रांदचे कुडींतलो मुखेल जीनस म्हळ्यार भिण्णां. दाळ, कडयेंत वापरपी हो एक आंबट जीनस. हाचे जायते फायदेय आसात. गरमेंत ह्या भिण्णांच्यो साल वतांत सुकयतात. त्यो सुकोवन तातूंत मीठ घालतात. ताका आमी सोलां म्हणटात. सोलां वापरतना आमी चिंचूय पर्याय म्हणून वापरतात.
खारें नुस्तें – पावसांत नुस्तेंमारीचेर बंदी आशिल्ल्यान ह्या दिसांनी ताजें नुस्तें मेळप कठीण जाता. नुस्तें खावपाची इत्सा पुराय करपाक बांगडो, बोंबील आनी सुंगटां सुकयतात. सुकयल्लें हें नुस्तें तिगोवन दवरपाक खारट करतात आनी ताज्या नुस्त्याचो पर्याय म्हणून ते लोणच्यांत, सालादांत आनी कडयेंत वापरतात. सुंगटां आनी नाल्ल एकठांय करून गोंयची ‘किस्मूर’ नांवाचा एक सुचीक जिन्नस तयार जाता. जो गोंयच्या जेवणांतलो एक फामाद जिन्नस जावन आसा.
शेफ पॉल फर्नांडीस
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
