भांगरभूंय | प्रतिनिधी
शेतकी संचालक: अल्प काळा बदला दीर्घ काळाचें पीक लावपाचो उलो
पणजीः गोंयच्या शेतकारांक आपल्या भाताचें पीक हवामानाक अनुकूल करचें पडटलें. उसरां मेरेन पडपी पावसाक लागून आमकां दीर्घ काळाचें पीक लावचें पडटलें. जाका लागून हें भात पावस सोपले उपरांत उसरां पिकतलें. सद्या अल्प काळाचें पीक लायिल्ल्यान उसरां पडपी पावसांत ते कुसपाच्यो घडणुको घडटात, अशी म्हायती शेतकी खात्याचे संचालक संदीप फळदेसाय हांणी दिली.
फाटल्या तीन वर्सांचो नियाळ घेतल्यार नोव्हेंबर मेरेन भरपूर प्रमाणांत पावस पडटा. ह्या तीन वर्सांच्या पावसाचो ट्रेंड पळयलो जाल्यार आमकां भात लावपाची पध्दत, जाती आनी काळांत मात्सो बदल करचो पडटलो, अशें मत फळदेसाय हांणी मांडलें.
गोंयच्या लोकांचो ज्योती भात हो आवडटो देखून चडशे शेतकार अल्प काळाचें पीक, ज्योती ह्या जातीच्या भाताची लागवड करतात. जर सेगीत पावस पडलो जाल्यार हें अल्प काळांत पीकपी भात पेड्ड्यार जाता. देखून दीर्घ काळाचें पीक देखीक ‘जया’ ह्या भाताचे जातीचो आमकां पर्याय वेंचचो पडटलो. दीर्घ काळाचें पीक लायल्यार तांची पिकावळ सुबेज येता आनी हें पीक ऑक्टोबर उपरांत तयार जाता. पावसांत जावपी शेताचेे लुकसाणीचेर होच उपाय आसतलो, अशी म्हायती फळदेसाय हांणी दिली.
पावसांत तीन वाठारांनी पीक आडवें
अंदूचो ट्रेंड पळयलो, फाटल्या सप्तकांत पीक बरें आशिल्लें. सगळें पीक उबें आशिल्लें आनी खंयसरूच तें आडवें पडूंक ना. मात ह्या सप्तकांत फाटल्या दोन तीन दिसांनी सेगीत पडपी पावसाक लागून पीक आडवें पडलां. ह्या पावसाक लागून बार्देस म्हालांत, मयें गांवांत आनी मडगांवां भात आडवें पडिल्ल्याच्यो घडणुको नोंद जाल्यात. मात हें भात आडवें पडून अजूनय पिकाचें लुकसाण अशें कांयच जावंक ना. जर भात सामकेंच आड पडून ताका कोंब आयले जाल्यार आमी ताचें विश्लेशण करुन शेतकारांक शेतकरी आदार निधिंतल्यान लुकसाण भरपाय दितले, अशें आश्वासन फळदेसाय हांणी दिलें.
पावसांत लुवपाच्या माक्नांक अडचणी
राज्यांत चडश्या सुवातांनी माक्नांच्या आदाराचेर भात लुवतात. जर पीक उबें आसल्यारच माक्नां वरवीं लुवप सोपें जाता. जर पीक आड पडलें जाल्यार माक्नांचो वापर सोडून तें हातांत कापचें पडटा. आमी सादारण एका म्हालांत 15 माक्नां घालून 15 दिसां भितर भात लुवपाची मोख दवरतात. मात पावस पडिल्ल्यान माक्नांचे तांकी प्रमाण भात लुवप जायना. पावसाक लागून ं गती देंवता आनी भात लुवपाक कळाव जाता. एक माक्न जर दिसाक 10 वरां काम करतलें जाल्यार फक्त ६ वरां ह्या माक्नां कडल्यान काम जाता. शेतान उदक आशिल्ल्यान माक्न चलोवपाक आडखळी येतात, अशें फळदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
