भांगरभूंय | प्रतिनिधी
पावसांत पुराय सैम पाचवोचार आसता आनी हो हंगाम सगळ्यांकूच आवडटा. पूण ह्या हंगामांत पावसाक लागून किडे, जळारां, मूस घरांत भोंवतना दिसतात. ह्यो किडी चाबल्यार बरेच त्रास जावपाक शकतात. अशा वेळार तांकां घरांतल्यान भायर काडचे पडटा. तशेंच त्यो घरा भितर सरच्यो न्हय म्हणून तुमी कांय घरगुती वस्तू वापरून उपाय करपाक शकतात.
बेकींग सोडा
बेकींग सोडा खुबश्या घरच्या वापरतात. पावसांत किडे, मूस, जळारां पसून मुक्त जावपा खातीर तुमी बेकींग सोडा वापरूंक शकतात. हे खातीर एके स्प्रे बाटलेंत उदक, लिंबाचो रस आनी बेकींग सोडा घालून तो स्प्रे मूस, किडी येवपी सुवातांचेर मारचो.
कोडुलिंबाचें तेल
ह्या किड्या आनी जळारां पसून स्वताक वाटवपाक कोडू लिंबाचें तेल सामकें फायद्याचें. कोडुलिंबाच्या तेलाचो वास घरांत येवपी किडें, जळारां, मूस पयस करतात. तेलांत उदक घालून घरांत ताचो फवारो मारल्यार ह्या किड्यांचे त्रास जाणवचे ना.
कापूर जळयात
घरांत कापूर जळयल्यार घरांत पावसांत येवपी घाणयारो वास पयस करपा वांगडा किडी , मुसूय घरांतल्यान पळटात.
मीठ आनी लिंबू
मूस घरांतल्यान धांवडावपाक तुमी घरांतूच वखद तयार करपाक शकतात. हे खातीर तुमकां एक लिंबू, २ चमचे मीठ आनी एक ग्लास उदक लागतलें. एक लिंबू कापून एक ग्लास उदकांत तो पिळून तातूंत मीठ घालात. ह्यो सगळ्या गजाली बर्यो मिक्स करून त्यो स्प्रे बाटलेंत घालात. आतां जंय मूस दिसतले थंय फवारो मारात. हाका लागून मूस पयस वतले.
ऍपल सायडर व्हिनेगर
ऍपल सायडर व्हिनेगर घरांतल्या मुसां पसून मुक्त जावपाक प्रभावी थारता. ऍपल सायडर व्हिनेगर उदकांत बरें घोळयात. उपरांत तें स्प्रे बाटलेंत भरून घरभर शिंपडात. हाका लागून घरांतले मूस रोखडेच ना जातले.
फिनायल
मॉपिंग करतना, जर उदकांत फिनायल घालें आनी उपरांत घर पुसलें जाल्यार तुमची सहज मुसां पसून सुटका जातली. मूस धांवडावपाचो हो सगळ्यांत सोपो आनी प्रभावी तशेंच आदलो उपाय.
ह्यो टिप्स म्हत्वाच्यो
सगळ्यांत म्हत्वाची गजाल म्हळ्यार घरांतले नितळसाणी कडेन लक्ष दियात. आशिकुशीक उदक सांठून उरपाक दिवं नाकात. सदांच घरांत जावपी कोयर उडयात. तशेंच्या ह्या मोसमांत जनेलां बंद दवरात. तांकां जाळी लायात जाका लागून मूस, जळारां, किडे घरा भितर सरचे ना. तशें मंद बल्ब लायात. वा हळदुवे. असल्या मंद उजवाडांत किडे कमी भोंवतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
