भांगरभूंय | प्रतिनिधी
पणजी : म्हादय खातीर स्थापन केल्ल्या प्रवाह समितीची बसका फाल्यां मंंगळारा बंगळूरूंत सकाळीं 11 वरांचेर जातली. कळसा – भांडुरा प्रकल्पाच्या थळा सयत म्हादयच्या पात्राची जोड पळोवणी पावसांत करपाची मागणी गोंंया वतीन जातली. गोंंयच्या अधिकाऱ्यांंक स्थितीची खोलायेन म्हायती आसा. गोंयच्या हिताची भुमिका बसकेंत मांंडटले अशें उदका पुरवण खात्याचे मंत्री सुभाष शिरोडकार हांणी सांगलें.
सर्वोच्च न्यायालयाच्या आदेशा प्रमाण स्थापन जाल्ल्या प्रवाह समितीची ही चवथी बसका आसा. फाटल्या म्हयन्यांत ही बसका मुंंबय थारिल्ली. निमाण्या वेळार ती रद्द जाली. बसके खातीर उदका पुरवण खात्याचे मुखेल अभियंते प्रमोद बदामी, अधिक्षक अभियंंते दिलीप नायक, उदका पुरवण खात्याचे सचीव गील बंंगळुरू वतले. म्हादयचो प्रस्न हो सर्वोच्च न्यायालयांत आसा. सर्वोच्च न्यायालयाच्या आदेशा प्रमाण प्रवाह समितीची स्थापणूक जाल्या. न्यायालयांत बाजू मांंडपाक जो तपशील जाय, ते प्रमाण गोंंयचे अधिकारी भुमिका मांंडटले. म्हादयचें पात्र तशेंच कळसा – भांंडुराच्या प्रकल्प थळाची जोड पळोवणी करपाचे मागणेचेर भर आसतलो, अशें मंंत्री सुभाष शिरोडकार हांंणी सांंगलें.
म्हादयचेर उदका पुरवण करपी ल्हान धरणां उबारपाचो प्रस्ताव आसा. ह्या प्रकल्पांंक मान्यताय दिवपाच्या प्रस्नाचेर चर्चा जातली. तशेंच म्हादयचेर विर्डी हांंगा धरण बांंदपाचो महाराष्ट्राचो प्रस्ताव आसा. ह्या धरणाच्या आराखड्याचेर चर्चा जातली. विर्डी धरण गोंंया खातीर पुरक थारतलें. हाका लागून महाराष्ट्राच्या प्रस्तावाक गोंय सरकार तेंको दितलें. म्हादय पात्राची जोड पळोवणी करपाची मागणी गोंय सरकारान केल्या. हे मागणेचो विशय बसकेच्या कार्यक्रम पत्रिकेचेर आसा.
सगल्या राज्यांंनी डेप्युटेशनाचेर प्रवाह प्राधिकरणाचेर अधिकाऱ्यांंची नेमणूक करपाक जाय. हो विशय प्रशासकी आसलो, तरी बसकेंत चर्चेक येतलो. प्रवाहाचें कामकाज चलपा खातीर गोंंय, महाराष्ट्र तशेंच कर्नाटक ह्या राज्यांंनी निधीची तजवीज करपाक जाय. निधीचेर चर्चा जातली. पर्वरे कार्यालयाची स्थापणूक तशेंच वॅबसायट सुरू करपाच्या विशयाचेर चर्चा जातली. प्रवाहा खातीर कायमस्वरुपी कार्यालय गोंंयांंत आसचें, अशी गोंंयची मागणी आशिल्ली. ही मागणी मान्य जाल्या. आतां कार्यालया खातीर जागो दिवपाची जापसालदारी गोंय सरकाराची आसा. हो विशय लेगीत अजेंड्याचेर आसा.
आयज खात्या खाला घेतले बसकाः बदामी
हे विशीं मुख्य अभियंते प्रमोद बदामी हांचे कडेन संपर्क सादलो तेन्ना, बसकेची तयारी आमचे कडल्यान सुरू आसा. सोमारा हे विशीं खात्या खाला बसका घेतले अशें तांणी सांगलें.————
बसकेची उदका स्रोत खात्या कडल्यान तयारीच ना
मंगळारा बंगळुरूंत जावपी प्रवाह समितीचे बसकेची उदका स्रोत खात्यान योग्य प्रकारान तयारी केल्ली ना. बसकेंत नेमक्या खंयच्या मुद्यांचेर भर दिवचो, सर्वोच्च न्यायालयांतल्या सुनावण्यांचो आदार घेवन कर्नाटकाक बसकेंत कशे तरेन उक्तें करप हे विशीं उदका स्रोत खात्याच्या अधिकाऱ्यांची अॅडव्होकेट जनरल देविदास पांगम हांचे कडेन बसका जाल्ली ना अशी म्हायती खात्याच्या गोपांनी ‘भांगरभूंय’ कडेन उलयतना दिली. अधिकाऱ्यांनी अजून मेरेन कोणाच कडेन बसका घेतिल्ली ना. नाजाल्यार अशेंय म्हणूं येता की बसके कडेन कोणूच गंभीरतायेन पळयनात अशेंय गोपांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
