भांगरभूंय | प्रतिनिधी
पावस बेगीन सुरु जालो. अंदमान ते गोंयां मेरेन. अदींमदीं आसोरांतय जुलय सोंपतना पावस साडेपांच टक्के चड आसा. 2025 पावसाच्या आरंभाक अंदूं वर्साच्या सर्वसादारण पावसाचें प्रमाण पांच टक्के अधिक आसतलें हो अदमास भारतीय वेधशाळेन उक्तायल्लो. येतना उमाशेक आयिल्लो पावस मदीं विसव घेत परतून श्रावण लागीं येतना नेटान पडिल्ल्यान शेतां, भाजी, फळफळावळीचें गणीत चुकतलें. 2024 वर्सा जाल्ल्या काँक्रीटायजेशनाचे हे परिणाम व्हय? उदरगतीच्या वाऱ्यांत, हुंवारां परस जून म्हयन्यांतलो उटंगार जुलय म्हयन्यांत आयलो. पावसा बराबरीन थंडसाण वाडटा. पश्चिम घाटांतल्या पावसाच्या चार स्टेशनांनी इंचांचो शेंकडो भरला. अजूनय आमची सैमसंपदा आसा गवाय दिवपी हो पावस. केन्ना धुंवरेल्लो, केन्ना कापसावरी धव्या कुपांनी घुस्पल्लो. भूंय पांचवीताल्ल करतना जायो, घोंसाळ्यांच्या माटवांक धपकोय दिवन गेला आसतलो, दुदी व्हडा प्रमाणांत घेवन येतलो?
पावसांतल्या जायांचो परमळ, पातोळ्यांचो घमघम पयलींवरी नासत, पूण मनां काळजाक उमेद, थाकाय दिवपी. धरतरेची उबाळांतली थाकाय धांवडावपी, मातयेचो वास घेवन येवपी पयलो पावस, श्रावणांतल्या कवितांचो पावस, घसघशांतलो दुधाळ पावस कितलीं रुपां. हेर ऋतुमाना परस पावसांतलें सैमरुप म्हेळें, भिजयतना तिडक हाडपी आसूनय खोस घेवन येवपी.
पावसांत पातोळ्यांच्या घमघमांत घरांय भिजतलीं. पातोळ्याचीं पानां हाडप, तीं पुसप, चून करप, पातोळ्यो पानार थापप, उकडप. गिरवडीच्या वावरांत कालचे घराबे एकवटातले, चवथीक आयजय एकठांय येतले. पातोळ्यो नागपंचम ते चवथी मेरेन तीन चार वेळा करतात, पानां वर्सभर उरतात. केन्ना फोवांतल्यान, केन्ना घराव्या तुपांतल्यान दिसतात. पातोळ्यो देसांतल्या सगल्या राज्यांनी जातात, खंय तीख, खंय गोड, खंय सोयेच्यो, खंय भाजेच्यो. कालचें पातोळ्याचें पीठ तांदळाचें, गोडेमूत आशिल्ल्यांक गवां पिठाच्यो पातोळ्यो भावतल्यो.
अळम्यांचो फोव नागपंचमी उपरांत मात्सो उणो जायत अश्टम लागीं येतना अधिकय मेळत. नागपंचमीक देवळांतल्या सप्तांत दोण्यांतली चण्याची उसळ कालचेवरी कशी आसतली ? दोणेय रुप बदलतात पत्रावळी, ताटांय नव्या रुपांतलीं. पावसांतल्या उत्सवांतल्यान चवथींत म्हारगाय वाडटली, चवथीक गांवांगांवांनी दडकांचो पावस, आंगणां भिजोवपी. पानां पावसाचें व्हड नातें, पानगळती वाडोवपी. उटंगारांत धरणी, हरणी, चुडटांक भिजोवपी, झाडां, खांदयो मोडून उडोवपी. पावसापरस वाऱ्याच्या धपक्यान जावपी लुकसाणेंत बिजलीय पालवतली. दिवली, दिवे, मेणवात बदलतना उजवाडांत उजवाड दिता. दिवटी, काजुले जंय शेण्टात त्या रानांतलीं झाडां पावसाचें बळी थारतात.
पावस सांगून येना तरी मळबांत चलपी, भोंवपी कुपांतल्यान तो दिसता. वेधशाळा तांची पारख करुन अदमास सांगता. वेधशाळेचे अदमास फाटीं फुडें जायत पूण अदमासांतल्यान बारीकसाण घेतल्यार गाड्यो, विमानां, रेल्वे टायमटेबल बदलपाक, अपघात उणें करपाक मजत जावंक शकता. अंदूंच्या पावसाचें आतां मेरेनचें खाशेलपण म्हणल्यार अचकीत येवपी खर वत. त्या वतांत चलता, भोंवतना अकस्मात आयिल्लो श्रावणातलो पावस, वाऱ्यांत सत्री हातांतल्यान घेवन वतलो. सत्रेफाटल्यान न धांवप, भिजप बरें. कांय वेळा दीस दीस घरांत आडावन दवरपी पावस वर्सावळीप्रमाण अंदूय आयला, गाडयो उपेगी गाड्यांच्या धनयांक. समेस्तांचो दिसवडो चुकचोना.
रुची बदलतात तशो पातोळ्यांचो पावस घरांनी उणो जाल्लो दिसतलो. जायो परमळ घेवन वर्सभर शारांत वण्टींवल्यान येतल्यो, घरांच्या वण्टींतल्यान जायांचो परमळ येतलो. दसकांतल्या बदलपी पावसांतल्यान फळां, फुलांचो ऋतू बदलता तें म्हयनो, दोन म्हयने अभ्यास केल्यार कळटलें. ताचो उपेग फुडारांत धा वर्सांनी जातलो जाल्यार बदलपी पावसाच्या थेंबांचें निरीक्षण करता व्हय वेधशाळा? निळें मळब शेणटना मळबांतलो इंद्रधोणूय उसरां दिसतलो, दिसपटीय बदलतली. वातावरण बदलांचो संवसारीक पावंड्यार काल जाल्लो अभ्यास गिन्यांन्यांकय दुसरे दिसा फट थारयता. खिणा खिणांक म्हत्व येता तेन्ना पातोळ्यो केळीच्या पानांर केल्ल्यो दिसतल्यो. जायो वेलीरच पावसांत बाविल्लीं, धरतरेर पडिल्लीं मेळटलीं. त्यो पुंजावपांत मजा आसता, पुंजायतना पावस भिजयतलो. जायो अळंग बोटांनी वेली वयल्यान काडटना वेलींत लिपिल्ले पावसाचे थेंब हातार येवचेना, हे भूंयेंत जिरतले. नवें बीं किल्लतना पळोवपांत खोस आसता. भावा भयणीच्या नात्यांतल्या सुतांत राखयांचो पावस पडटलो. त्या पावसाचे रंग वेगळे, रुपांतलो बदलय अजापाचो, वाचात ज्येश्ठांच्या दोळ्यांत. भास दोळ्यांची, हुस्क्याची आनी हुस्क्या मेकळें जावन वावुरपाची.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
