भांगरभूंय | प्रतिनिधी
मडगांव : कोकण रेल्वेन पावसांतले सुरक्षितताये खातीर खास तयारी केल्या. १५ जून सावन २० ऑक्टोबर मेरेन पावसाळी वेळापत्रक लागू केलां. घोग्यांनी पावसांत आनी उण्या दृश्यमानतेचे स्थितींत रेल्वेचो वेग तासो ४० किमीचेर दवरपाच्यो सुचवण्यो लोको पायलटांक दिल्यात. रुळांचेर १०० मिमी परस चड उदक साचल्यार गाडयांची सेवा तात्पुरती आडायतले, उदक उणें जाले उपरांत ती परत सुरू करतले, अशी म्हायती कोकण रेल्वे प्रशासनान दिली.
सुरक्षितताये खातीर खासा उपाय येवजण:
मान्सून हंगामांत प्रवाशांची सुरक्षा आनी रेल्वे सेवेंतल्यो आडखळी उण्यो करपा खातीर ड्रेनेजज नितळ, पालसणांची तपासणी, ६३६ गस्त कर्मचारी, आपत्कालीन यंत्रणां तयार दवरल्यांत. रत्नागिरी, चिपळूण, वेर्णा आनी कणकवलीचीं उत्खनन यंत्रां आनी अपघात मदत व्हॅगन्स तैनात केल्यात.
आपत्कालीन संपर्क यंत्रणां सज्ज : लोको पायलट आनी गार्ड खातीर वॉकी-टॉकी, व्हिएचएफ सेट्स, जाल्यार दरेका १ किमी अंतराचेर आपत्कालीन संप्रेशण सॉकेट्स बसयल्यात. पावसाची पातळी मेजपा खातीर माणगांव, रत्नागिरी, मडगांव सयत ९ सुवातांचेर स्वयंरेकॉर्डींग पर्जन्यमापक कार्यरत आसात. मुखेल न्हंयांचेर हुवाराची शिटकावणी प्रणाली, तशेंच वार्याचो वेग मेजपा खातीर ऍनिमोमीटर बसयल्यात.
24X7 नियंत्रण आनी वैजकी कूड सज्ज :
बेलापूर, रत्नागिरी आनी मडगांवां २४ वरां नियंत्रण कक्ष, जाल्यार चिपळूण, वेर्णा, मडगांव, कारवार आनी उडुपी वैजकी पंगड तयार केल्यात. प्रवाशांनी गाडयांची स्थिती www.konkanrailway.com वा १३९ क्रमांकां तपासची, असो उलो प्रशासनान मारला. कोकण रेल्वेन सुरक्षीत, वेळार आनी आडखळ बगरच्या प्रवासा खातीर पावसांत विशेश तयारी केल्ल्याचें प्रशासनान स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
