भांगरभूंय | प्रतिनिधी
भांगरभूंय । प्रतिनिधी
वाळपयः पावसाच्या दिसांनी सत्तरी तालुक्यांतल्यो न्हंयो, वझरे आनी घसघश्यांच्या प्रवाहाक सुरवात जाता आनी तांचें सैम रुप पळोवपाक तरणाटे व्हडा प्रमाणांत येतात. कांय तरणाटे सोरो पियेवन मस्ती करतात आनी आपलो जीव वोगडायतात. पोरूं अशेच तरेन आठ जाणांनी जीव वोगडायल्लो पर्वरेचो शिवकुमार पवार अंदूच्या पावसांतले मस्तीचो सत्तरीचो दुर्दैवान पयलो बळी थारलो.
वेळगे हांगा न्हंयेंत देंवल्लो शिवकुमार व्हो बुडून मरपाचो प्रकार आयतारा जालो. त्या दिसा उजो पालोवपी दलाच्या जवानांनी ताचो सोद घेतलो पूण कूड मेळूं नाशिल्ली. सोमाराक ती उदकांत उफेली आनी जवानानी ती भायर काडली. पोरूं अशेच तरेन आठ जाण मेल्ले. अदूं तशे प्रकार जावचे न्हय हे खातीर पुलीस आनी संबंदीत सरकारी यंत्रणेन ज्या सुवातांनी पर्यटक येतात थंय पुलीस पारो दवोरपाचो विचार करचो अशी थळाव्या लोकांनी मागणी केल्या.
शिवकुमार आपल्या चार इश्टां सयत घसघशे आसात थंय आयिल्लो. मात ते प्रवाहीत जावंक नाशिल्ल्यान ते वेळगें हांचे राजग्याची कोण हे सुवातेरगेले. दनपारां ते न्हंयेत देंवले. सांजे 5च्या सुमाराक शिवकुमाराक आपलो एक इश्ट बुडटा हें दिसलें. ताणे ताका वाटायलें मात आपलो जीव तो वाटावपाक शकलो ना. वाळपयच्या उजो पालोवपी कार्यालयात म्हायती मेळटगीर तांणी कुडीचो सोद घेवपाचो आयतारा रातयां उसरां मेरेन यत्न केलो.
सोमाराक सकाळी सोद मोहीम परत सुरू केली तेन्ना दनपारां शिवकुमाराची कूड उदकांत उफेली. उजो पालोवपी दळाचो अधिकारी संतोष गांवस हाच्या मार्गदर्शना खाला कूड भायर काडली. शिवकुमार जंय बुडल्लो थंय उदक खोल तशेंच थंय फातर आसात. कूड ह्या फातरांत अडकून उरल्ली आसुये अशें गांवस हाणे सांगलें.
सोरो पियेवन मस्ती करपाच्या प्रकारांक लागून पोरूं आठ जाण मेल्ले. कुमठोळ हांगच्या घसघश्यार वास्कोंतले दोग जाण बुडल्ले. शिवकुमाराची कूड उदकांतल्यान भायर काडले उपरांत वाळपय पुलिसांनी पंचनामो करून ती फुडल्या सोपस्कारा खातीर बांबोळे जीएमसींत धाडली. पुलीस निरीक्षक दिनेश गडेकार फुडलो तपास करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
