भांगरभूंय | प्रतिनिधी
पातोडेर वळ दीत दीस जागो जाता… रातभर गायत बशिल्ले रातकिडे, तबलें पेटयो गुठलावन विसव घेतात… तांच्या त्या रडक्या पदांनी मोव जाल्लें मळब सकाळभर दुकां गळयत रावता… आनी माथ्यार न्हाल्ली अस्तुरी कशी मेकळे सोडिल्ल्या केंसांच्या भांगा मदीं कुकूम भरता तशीं सुर्याचीं पयलीं किरणां धर्तरेर फांकतात… सगळ्या पंडितांची मैफील आशिल्ले वरी सवणीं रुखार भुपाळी आळावपाक लागतात… आनी तांचो सन्मान करपाक धुक्याची दाट शाल ओडून हें सैम तांचे कलेचो भोवमान करता… मदींच एकाद्रो कावळो गर्विश्ट निवेदका वरी कांवकांवत पंगतींतल्यान उठून वता…
तीं पानां, झाडां शिरशिरतात, नवें वत नवो दीस… एक नवें ताल्ल सपन उकत्या दोळ्यांनी पळयत दीस वजें माथ्यार मारून दिसपट्ट्या कामाक भायर सरता. कांय सुमाना पयलीं आयिल्ली नवी व्हंकल कुळार सोडून वचपाची तयारी सुरू करता, तसो पावस मदीं मदीं दडक दर दडक करून आपल्या घरा शेंवटता. आतां ताच्या आडांगीपणाक कुळारचींय बेजारिल्लीं आसतात, पूण आवयचें काळीज तें, तशें सट्ट करून वचूंक दिना. वतना लातां भरून खाण जेवण दिता… त्या वेळार जो जीव कासावीस जाता… सांगपाक नजो…
तें चल्लें खरें पूण वतना सव्वाशिणीची व्हटी पाचव्या शालवान भरता आनी शेता कणकणीं भांगर दिवन वता. फुडले कांय म्हयने ताची आवय फांत्यार दुकां गळयत बसता… आतां तिणें दिल्लें भांगर पळोवन आंगांनी गरमी येता… सळसळपी तें भांगर आनी व्हटयेन घाल्लो पाचवो शालू आतां काडपाचो तेंप येता. आनी केन्ना केन्ना याद सोंसूंक नजो जावन तें परत येता… आवय रागार जाता… संवसार कर गो सुखाचो म्हणून वयल्या वयल्यान गाळयो संवता… तें गडगड करता, जगलावता, आकांतान ओतता… सगलें मातये भरवण करून आपल्या घरा शेंवटता.
ताचो तो ताप येदो व्हड की सगले कडक वतान तडफडटात… ताका फुसलायतात, ताका बेगीन यो म्हणून आपयतात… आंब्या पणसाचीं ताटां, घोटां घशीचीं ताटां, मोगरेचो पोड, आनी तन्न तांबडो गुलमोहराचो तुरो मिरयत बापूय आपले धुवेक वजें घेवन आपोवणें करपाक वता. हय न्हय करत तें परत येवपाक भायर सरता… मीर्ग चुकता… पूण आशाड पांवळी ते चुकयना…
मोगान पिशे जाल्ले कांय रोखडेच चंवरून येतात आनी ह्या आवय धुवेल्या रागान करपून वतात… परत तें येताशें दिसलें कांय ताच्या मोगाचो भार झेलत आंगा वयल्यान करपल्लो चंवर झडयत, नव्या ताल्ल चंवरान शेणून वतात… आपल्या संवसारांत गुथून आंगां खांदार रसरशीत फळावळ खेळयतात… पूण चड तेंप ताचो विरह सोंसूंक नजो… तांचीं आंगा झडून पडटात… आनी दर दिसा ताची वाट पळयत ते वाऱ्या वांगडा धोलत रावतात… ताका रकाद पावता… आनी तें घसघशांनी येवपाक लागता…
जळाथळा उदक भरता आनी ‘उदकान कोण उडयो मारतलो?’ ह्या प्रस्नाची जाप सगले बेबे ‘हांव, हांव’ अशें एके सुरान दिवपाक लागतात… नखेत्रां मळब सोडून जमनीर देंवचीं तशे काजुले अटंग काळख्या राती कुळागरांनी लिकलिकपाक लागतात… म्हारू बशिल्ले वरी झाडां-पेडां खुदपाक लागतात… झरे फुटिल्ले व्हाळ लज सोडून हांसतात… खळखळटात…
पाना-पानांर टपटपत तो परत येता कुळारा… फाटले सगले विसरून… मन भरसर भाटां-भेसां भोंवता… एक नवी आस घेवन येता…
सारंग अग्रासनी
9921868202
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
