पाळे – शिरदोनकारांचें आंदोलन पेटलें

भांगरभूंय | प्रतिनिधी

आमदार बोरकार हांकां इस्काती वयल्यान फरफटीत काडलो भायर

39 (अ) कलमा आड बोरकार हांचें आमरण उपोशण सुरू

भांगरभूंय । प्रतिनिधी

पणजी : कलम 39 (अ) आड पाळी- शिरोदनकारांच्या आंदोलनाच्या दुसऱ्या दिसा बरेंच पेटलें. जे मेरेन कलम 39 (अ) खाला सांत आंद्रे मतदारसंघांत प्रस्तावीत झोन बदल रद्द जायना ते मेरेन आमरण उपोशणाक बसपाचो निर्णय थळावे आमदार विरेश बोरकार हांणी घेतला. तशेंच ज्या पुलिसांनी तांकां ओडून व्हरत मारबडय केल्या तांच्या निलंबनाची मागणी केल्या. शेनवारा सकाळीं गोंयभरांतल्यान लोकांनी येवन ह्या उपोशणाक तेंको दिवचो, असो उलो विरेश बोरकार हांणी मारला.

शुक्रारा सकाळ सावन सांत आंद्रेचे आमदार विरेश बोरकार हांच्या फुडारपणा खाला पाळी- शिरदोन तशेंच पुराय सांत आंद्रे मतदारसंघांतले 39 (अ) खाला जाल्ले प्रस्तावीत झोन बदल रद्द करपाचे मागणे सयत खात्याचे कचेरेंत आंदोलन करीत बशिल्ले. जे मेरेन अधिकृत आस्वासनाची वाट पळयत पुराय रात आंदोलकांनी खात्याचे कचेरे भितर काडली. दुसऱ्या दिसा आंदोलन सदचे भशेन सुरू केले उपरांत पुलिसांची फौज कचेरे भितर घुसली आनी आंदोलकांक फोर्सान भायर काडपाक सुरवात केली. हातूंत विरेश बोरकार हांची पुलिसा मदीं धक्काबुक्की जावन तांकां जमीन आनी इस्काती वयल्यान पुलिसांनी फरफटत व्हेले. पुलिसांनी आपल्याचेर फोर्साचो वापर केल्ल्यान आपले मानेक आनी तकलेक मार लागिल्ल्याची कागाळ बोरकार हांणी केली. उपरांत 108 अ‍ॅम्ब्युलन्स आपोवन बोरकार आनी आंदोलकांची तपासणी केली.

ह्या आंदोलनाक बोरकार हांकां विरोधी पक्ष फुडारी युरी आलेमांव, बाणावलेचे आमदार वेन्झी व्हिएगस हांचो तेंको फावो जालो. उपरांत थळाव्यांनी आपलो मोर्चो आझाद मैदाना कडेन घुंवडावन बोरकार हांच्या आमरण उपोशणाक सुरवात केली. ह्या वेळार हळदोणेंचे आमदार कार्लुस फेरेरा, वेळ्ळीचे आमदार क्रुझ सिल्वा वांगडा पर्यावरण मोगी क्लावड आल्वारीस तशेंच हेर समाज वावुरप्यांनी आपलो तेंको बोरकार हांकां जाहीर केलो.

कसलीच परवानगी वा आदेश नासतना पुलिसांनी थळाव्या लोकांक तशेंच आमदाराक फरफटयत कचेरेंतल्यान भायर काडले. आमकां हात घालपाक आदेश आसा काय कितें असो प्रस्न विचारल्यार आमकां तोंडी आदेश आयला अशी जाप तांणी दिली. पूण कोणे हो आदेश दिला तें सागूंक ना. देखून हे सगल्या पुलिसांक निलंबीत करचे, अशी मागणी बोरकार हांणी केल्या.

तशेच 39 (अ) कलमा खाला झोन बदल रद्द करचे ही आमची ठाम मागणी आसा. लोकांक तुमी दरेके खेपे रस्त्यार हाडटात. दुसरी रात जावन लेगीत आमकां सरकारा कडल्यान ठोस आस्वासन मेळना. जे मेरेन आमची ही मागणी पुराय जायना ते मेरेन आमी आमरण उपोशणाक बसतले. आयज आयतारा सगल्या गोंयकारांनी एकचार दाखोवन आझाद मैदानाचेर येवचे, असो उलो बोरकार हांणी मारला.

विरेश हो एक वेंचून आयल्लो प्रतिनिधी. ताका धक्काबुक्की केल्या हें पळोवपाक खातीर सरकारान कोणाक तरी धाडपाक जाय आसलो, पूण अजून मेरेन कोण येवंक ना, अशें विरोधी पक्ष फुडारी युरी आलेमांव हांणी म्हणलें.

जे मनीस हे घडणुकेंत वांटेकार आसात तांकां निलंबीत करपा खातीर आनी 39 (अ) कलम रद्द करपाची मागणी करत आयच्या दिसा एकठांय जावन भाजपा आड मुखार सरपाक जाय. पुलीस हे खामसुत्री बावले जाल्यात. गोंयांत कायदो आनी सुवेवस्था उरूंक ना. भाजपाचें सरकार मिशन फक्त टोटल कमिशन जावन आसा, असो आरोप आलेमांव हांणी केलो.

‘पुलिसां आड दाखल करतले हक्कभंगाचो प्रस्ताव’

कसलेंच लेखी आस्वासन नासतना आपल्याक फोर्सान भायर काडून जखमी केला. सध्या विधानसभा अधिवेशनाची सुचोवणी जारी केल्या आनी ह्या काळात म्हाका इस्काती वयल्यान झरयत भायर काडला. देखून पुलिसां आड विधानसभेंत हक्कभंगचो थाराव मांडटलों तशेंच पुलिसांचेर कायदेशीर खटलो चलयतलों, अशी शिटकावणी आमदार बोरकार हांणी दिवन हे विशींची लेखी कागाळ सभापतीक दिल्या, अशें सांगलें.

प्रकल्प फ्रीज करपाची शिटकावणी

कायदे हे विधानसभेंत जातात, रस्त्यार देंवून न्हय. ह्या सारकिल्ल्या ब्लॅकमेल डावपेचांक बळी पडचो ना, अशी प्रतिक्रिया नगर नियोजन मंत्री विश्वजीत राणे हांणी आंदोलना विशीं दिली. राणे हांणी केल्ल्या विधानाचेर खर टिका बोरकार हांणी करून सांत आंद्रे मतदारसंघांत थळाव्यांच्या जमनींचेर जीएमसी, एफडीए, मिलिट्री कॅम्प सारकिल्ले प्रकल्प आयल्यात. पूण ह्या प्रकल्पांनी नोकऱ्यो फक्त सत्तरीकारांक दिल्यात, ज्या लोकांच्यो जमनी गेल्यात तांकां नोकऱ्यो ना. देखून राणे हांणी आमकां ब्लॅकमेलर म्हणून आमी धजा मारची न्हय. पुराय गांव एकठांय जावन हे प्रकल्प फ्रीज करून उडयतले, अशी शिटकावणी बोरकार हांणी दिली.