पाळां – मुळां खणचीं

भांगरभूंय | प्रतिनिधी

बर्च बाय रोमियो लेन क्लबाच्या धनयाचीं कांय आस्थापनां सील केल्यांत, वागातोरा आशिल्ल्या क्लबाचो कांय वांटो मोडून उडोवपाची कारवाय जाल्या. क्लबाचे धनी लुथरा भाव पळून थायलॅण्डाक गेल्यात. आतां ते लंडनाक पावपाची शक्यताय न्हयकारूंक जायना. कारण हाचे आदीं देशाक अर्थीक नदरेन पोखरून बरेच हुंदीर थंय वचून लिपल्यात. हडफडेंच्या ह्या रोमियो क्लबाची नवी म्हायती मुखार येत आसा. ती धक्को दिवपी, भ्रश्टाचार, गुन्यांवाच्या मळाचेर उजवाड घालपी अशी. गोंयच्या पर्यटनाक हें सामकें धोक्याचें. हीच संद घेवची आनी सरकारान तें नितळ करचें.
दर्यादेगो, वेळांचेर चलपी वेवसायांत थोडेच गोंयकार आसतले. चडशे भायले. मागीर तांचे खातीर आमचे मायभुंयेन, आमी बदनाम कित्याक जावप? गुन्यांवांनी स्वताचो जीव कित्याक धोक्यांत घालप? हाचे पयलीं विदेशी, देशी चलयांक दर्यावेळांचेर दुबावीत मरण आयलां. कांय प्रकरणांचो तपासूय बंद जाला. तरातरांचे मार्ग आपणावन दुडू कसो करप, हाचोच विचार दर्यावेळां वयले वेवसायीक करतात आनी सरकारी यंत्रणेक हाता कडेन धरून मनाक येता तें करतात, अशें दिसलां. सध्या तिगांक निलंबीत केल्यात. आनिकूय कांय जाणांचेर गुळी येवंक शकता. ह्या रोमियो क्लबान कायदेशीर मार्गान एकूय परवानो घेवं नाशिल्लो खंय. हाचो अर्थ जें कितें घेतलें तें च्या- पाणयाचो खर्च दिवन! थळाव्या पुलिसांक ह्या क्लबाचेर कारवाय करपाची भांगरा संद मेळिल्ली. एकदां न्हय, जायते फावटी. पूण दर खेपे एक आयपीएस अधिकारी खंय मदीं हस्तक्षेप करतालो. हाता सकयल्या पुलिसांचेर चेपण हाडटालो. ही गजाल खरी जाल्यार कोणेंच ती पयलीं कित्याक उक्तडार हाडली ना? सरकारी यंत्रणेन त्या अधिकाऱ्या आड आवाज कित्याक काडलो ना? तो गोंयकार काय भायलो? भायलो जाल्यार तो गांवभावांक परोपकाराचे भावनेन मजत करतालो काय आनीक कसल्या कारणांक लागून? हणजूण्यां, हडफड्यां क्लब आनी पुलीस हांचे मदलो दुवो म्हूण एकलो वावुरता खंय. खरें हें? काय पुजा नायक प्रकरणा सारकें कोणें तरी ओगीच उठयलां? म्हणजे दर्यावेळांचेर कसल्याच प्रकारचो भ्रश्टाचार, गुन्यांव, गैरप्रकार जायना. लोक कारण नासतना उलयतात, बरयतात?? कितेंय आसूं, रोमियो क्लबाची खोलायेन चवकशी करपाक खाशेलो तपास पंगड वा आयोग स्थापन करपाची आतां गरज आसा.
झाडाचेर वाळटी दिसली काय ती तितलेच खांदये पुरती वा मुळा पुरती मर्यादीत नासता. बारीकसाणेन सांसपीत गेलो जाल्यार आनिकूय 4- 5 कडेन तिणें माती केल्ल्याचें दिसता. मागीर पुराय झाडाचेरूच वखद मारचें पडटा. हडफड्यां उजो लागलो, म्हूण हो क्लब बेकायदेशीर हें कळ्ळें. (अर्थांत थोड्यांक भांगराचें तांतीं दिवपी ह्या क्लबाचें हें गुपीत खबर आशिल्लें) नाजाल्यार फुडलीं 25 वर्सां ह्या कानाचें त्या कानाक कळचें नाशिल्लें. उज्याच्या निमतान वाळटी दिसली. ती ह्या क्लबा पुरतीच मर्यादीत आसा काय हेर कडेनूय लागल्या. म्हणल्यार हो एक क्लब सोडल्यार राज्यांतले बाकीचे सगले वेवसाय रेक्त, कायदेशीर? धरलो तर चोर, नातर साव, अशें बी ना मूं?
कांय सरकारी अधिकारी, पंचायती मनाक येता तें करतात, अशें वक्तव्य एका राजकारण्यान केलें. म्हणल्यार गोंयांत भ्रश्टाचार, गैरकारभार चल्ला ताका अधिकारी, कर्मचारीच जापसालदार आसात. हातूंत एक पसून राज्य आनी गांव पांवड्या वयलो फुडारी ना, असो अर्थ घेवपाचो? ह्या सगल्या शिगम्यांत गोंयचें पर्यटन मळ मात बाबडें इबाडटा, ताचें कोणाकूच पडिल्लें ना. कांय जाणांच्या मतान पर्यटक वाडल्यात. मजा- मस्ती करूंक चड पर्यटक येतात आसतलें. आंकडो आनिकूय वाडपाक जाय जाल्यार गोंय मुक्त बंदर करचें, अशें मात कोणें म्हणचें न्हय.