भांगरभूंय | प्रतिनिधी
भांगरभूंय । प्रतिनिधी
काणकोणः काणकोण पालिका वाठारातलें कावलाचे 9 अड्डे बंद करपाचो निर्णय काणकोण पालिका मंडळाचे बसकेंक घेतलो. वेगवेगळ्या वॉर्डांत आशिल्ल्या ह्या बेकायदेशीर अड्ड्यांत बेकायदेशीर गजाली चलतात शिवाय ताकां लागून भलायकेच्यो समस्या उप्रासतात. लोकवस्तींत वा लोकवस्ती लागीं हे अड्डे आशिल्ल्यान ते बंद करपाची मागणी थळावे लोक करताले. नगरसेवकांनी ते बंद करपाचो निर्णय एकमतान घेतलो.
चावडी ह्या काणकोणच्या मुखेल सुवातेर पोरण्या बसस्टॅण्डार आशिल्लो आनी फाटल्या जाय त्या वर्सां सावन लोकांक सावळी दिवपी पणसाचे झाड मारपा खातीर परवानगी मागपी पत्र काणकोणच्या उपजिल्होधिकाऱ्यांक धाडपाचें पालिका मंडळान थारायलां. व्हो पणस मारपाक पर्यावरण मोगींनी विरोध केलां. मात बसस्टॅण्डार छत्रपती शिवाजी महाराजाचो पुतळो बसोवपाचें थारलां. पणसाची ताका आडखळ जावपाची शक्यताय आशिल्ल्यान तो मारपाचें पालिका मंडळान थारायलां.
पालिका मंडळाचे बसकेंत सोपो करांत 10 टक्के वाड करपाचो निर्णय एकमतान घेतलो. पालिकेची दुकानां भाड्यान घेवन ती दुसऱ्यांक चलोवपाक दिल्यांत ते सबंदी चवकशी करपाचें पालिका मंडळान थारायलां. कदंब बसस्टॅण्डार आशिल्ले दुकानदार फाटल्या वीस वर्सा सावन पालिकेक वेपार परवानो फी भरनात ही गजाल नगरसेवक शुभम कोमरपंत हाणे मंडळाचे नदरेक हाडून दिली. व्हो एक व्हडलो घोटाळो आसा आनी ताका लागून पालिकेक कोट्यांनी रुपयांचेर उदक सोडचें पडटा अशें सागून दुकानांची मोलावणी करून दुकानदारां कडल्यान फी वसुली करून घेवपा खातीर पावलां घालपाची सूचोवणी कोमरपंत हाणे केली.
पोरण्या बसस्टॅण्डा वयलें पणसाचें झाड मारपाक दोन नगरसेवकांनी विरोध केलो. झाड मारचे परस ताचें संवर्धन करपा खातीर शिवाजी पुतळ्या संबंदी पर्यायी उपाय येवजण करपाची सूचोवणी शुभम कोमरपंत आनी धीरज नायक गांवकारान बसकेंत केली. ह्या पणसा पोंदां पयली मोटरसायकल पायलट स्टॅण्ड आशिल्लो. पणसा संबंदी निर्णय घेवचे पयलीं उपजिल्होधिकाऱ्याक पत्र बरोवन पळोवणी करपाक सांगपाचें बसकेंत थारलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
