भांगरभूंय | प्रतिनिधी
प्रकाश भिवशेट : उपनगराध्यक्षपदार विरोधा विणें निवड
भांगरभूंय । प्रतिनिधी
म्हापशें : उपनगराध्यक्ष पदाक न्याय दिवपाचो आपूण यत्न करतलों. म्हापशें शाराक सतावपी मुख्य प्रस्न कोयराचो. नगराध्यक्ष आनी नगरसेवकांचे मजतीन ताचेर उपाय काडपा खातीर आपूण प्रामाणीक यत्न करतलों. पालिकेंत लोकांचीं कामां बेगीन जावचीं हाचे कडेन गांभिर्यान लक्ष घालून प्रशासनांत सुसुत्रताय हाडपाचो यत्न करतलों, अशें प्रकाश भिवशेट हांणी सांगलें.
म्हापशें पालिकेच्या उपनगराध्यक्षपदार प्रकाश भिवशेट हांची विरोधा विणें निवड जाली. बुधवारा आपयिल्ले पालिका मंडळाचे विशेश बसकेंत भिवशेट हांचो एकल्याचोच अर्ज आयिल्ल्यान उपजिल्होधिकारी तशेंच पिठासीन अधिकारी वर्षा परब हांणी तांची विरोधा विणें निवड जाल्ल्याची घोशणा केली. ते उपरांत भिवशेट उलयताले.
हे बसकेक नगराध्यक्ष प्रिया मिशाळ, मुख्याधिकारी चंद्रकांत शेटकार, लेखा तशेंच प्रशासकीय अधिकारी उभय राणे आनी नगरसेवक – नगरसेविका हाजीर आसल्यो. निवड जाले उपरांत प्रकाश भिवशेट हांणी मुख्यमंत्री डॉ. प्रमोद सावंत, उपसभापती ज्योशुआ डिसोझा आनी सगळ्या नगरसेवकांनी आपल्याचेर विस्वास दवरून ह्या पदाचेर विरोधा विणें निवड केल्ले खातीर सगळ्यांचे उपकार मानले.
पालिकेंतल्यान फायली गायब जावप हो गंभीर प्रकार आसा. उपसभापती तशेंच थळाव्या आमदारांनी ह्या प्रस्नाचेर पुलिशेंत कागाळ केल्या. दोशी कर्मचाऱ्यांचेर फावोशी कारवाय जातली. ह्या प्रकरणांत सगळ्या नगरसेवकांक विस्वासांत घेतले, अशें भिवशेट हांणी स्पश्ट केलें.
चुकीच्या गजालींक घेतालों हरकत : भिवशेट
सगळेच नगरसेवक हे नगराध्यक्ष आनी उपनगराध्यक्षपदाची जापसालदारकी घेवपाक लायक आनी सक्षम आसात. पालिकेंत बरें प्रशासन हाडपाची तांक आपले कडेन आसा. आपूण आनी नगराध्यक्ष मेळून हें काम करपाक शकतात, अशें आमदाराक दिसलां आसुये. हे खातीर आपल्याचेर ही उपनगराध्यफदाची जापसालदारकी दिल्या. ती पुराय करपाचो आपलो प्रामाणीक यत्न आसतलो. आपूण सत्ताधारी गटाचोच भाग आशिल्लो. पालिका मंडळाचे बसकेंत नाका त्यो गजाली अजेंडाचेर येताल्यो. फकत ह्याच चुकीच्या गजालींक आपूण हरकत घेतालों, अशें उपनगराध्यक्ष भिवशेट हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
