भांगरभूंय | प्रतिनिधी
-20 हजार क्युबीक मिटर कोयराचेर प्रक्रिया सुरूपणजीः गोंय कोयर वेवस्थापन म्हामंडळान 2019 ते आतां मेरेन 5 लाख क्युबीक मिटरा परस चड वर्सान वर्स पडून आशिल्ल्या कोयराचो विलो लायला. जाल्यार 20 हजार क्युबीक मिटर पडून आशिल्ल्या कोयराचो विलो लावपाचे काम अजून मेरेन उरला. दोन पांवड्यांनी हे काम हातांत घेतिल्लें. निमाण्या पांवड्यार मडगांवच्या सोनसड्या सयत तीन पालिका क्षेत्रांतल्या कोयराचो विलो लायला.
जाल्यार दोन पालिका क्षेत्रांत कोयराचेर प्रक्रिया चालू आसा, अशी म्हायती गोंय कोयर वेवस्थापन महामंडळान दिल्या.
पडून आशिल्ल्या कोयराचो विलो लावपाचें काम दोन पांवड्यांनी म्हामंडळान हातांत घेतिल्लें. पयलो पांवडो 2019 ते 2024 मेरेन हातांत घेतलो. जाल्यार दुसरो पांवडो 2023 त हातांत घेतला आनी फेब्रुवारी 2025 मेरेन हो पांवडो सोंपून पडून आशिल्ल्या कोयराचो विलो लायतले. 16 सप्टेबर 2024 मेरेन 5,25,812 क्युबीक मिटर कोयराचो विलो लायला, अशी म्हायती म्हामंडळान दिल्या.
पयल्या पांवड्यार आठ पालिका क्षेत्रांतले 11 डंप आसात थंय प्रक्रिया चालीक लावन 4,52,938 क्युबीक मिटर इतल्या कोयराचो विलो लायला. पणजे म्हानगरपालिकेचे चार डंप आसात. तातुंतल्या कापांल डंपांत 5305 क्युबीक मिटर, ईडीसी पाटो स्टेट बँक अॉफ इंडिया फाटल्या डंपात 569 क्युबीक मिटर आनी कुडका डंपात 8621 क्युबीक मिटर इतल्या कोयराचो विलो लायला.
सगळ्यात चड कोयराचो विलो मडगांव पालिकेच्या सोनसोडो कोयर डंपात 1,72,178 क्युबीक मिटर आनी म्हापशें पालिकेच्या आसगांव डंपात 1,55,333 क्युबीक मिटर इतल्या कोयराचो विलो लायला.
मुरगांव पालिकेच्या हेडलँड सडा कोयर डंपात 96,530 क्युबीक मिटर, कुंकळ्ळी पालिकेच्या कुंकळ्ळी उद्देगीक वसणुकेंतल्या डंपात 4,955 क्युबीक मिटर, काणकोण पालिकेच्या धुमाणें श्रीस्थळ कोयर प्रक्रिया प्रकल्पांत 31,290 क्युबीक मिटर, दिवचल पालिकेच्या लांटबार्से कोयर प्रक्रिया प्रकल्पांत 3394 क्युबीक मिटर आनी पेडणें पालिकेच्या कोयर प्रक्रिया प्रकल्पांत 317 क्युबीक मिटर इतल्या कोयराचो विलो लायला.
पयल्या पांवड्यार पणजेतल्या तीन डंपातलो तशेंच कुंकळ्ळी, काणकोण आनी दिवचल पालिका वाठारांतल्या पडून आशिल्ल्या कोयराचो विलो लावपाची प्रक्रिया पुराय जाल्या. ह्या कोयराचो विलो लावपा खातीर कॅम इंडस्ट्रीयल सर्विसीस हांकां 9 कंत्राट, जाल्यार हिंदुस्तान वेस्ट ट्रिटमेंट लिमिटेड आनी सौराश्ट्र एन्व्हीरो प्रा. ली. हांकां दरेकी 1 कंत्राट दिल्लें.
जाल्यार दुसऱ्या पांवड्यार 6 पालिका क्षेत्रांतल्या कोयर डंपांत आतां मेरेन 72,874 क्युबीक मिटर कोयराचो विलो लायला आनी उरिल्ल्या 20 हजार क्युबीक मिटर कोयराचो विलो लावप चालू आसा. कुडचडें पालिकेच्या काकोडें डंपात 17985 क्युबीक मिटर, म्हापशें पालिकेच्या आसगांव डंपांत 31368 क्युबीक मिटर, पेडणें पालिकेच्या डंपांत 693.50, मडगांव पालिकेच्या हेडलँड सडा डंपांत 3163 क्युबीक मिटर, पणजे महापालिकेच्या ताळगांव डंपांत 10734 क्युबीक मिटर आनी मडगांव पालिकेच्या सोनसोडो डंपात 8929 क्युबीक मिटर कोयराचो विलव लायला.
कुडचडें, पेडणें, मडगांव आनी म्हापशें पालिकेच्या कोयराचो विलो लावपाची प्रक्रिया पुराय जाल्या. कुडचडेंच्या कोयराचेर कम्पोस्टची प्रक्रिया करपाचे उरला जाल्यार म्हापशें आनी मडगांव पालिकेच्या आरडीएफची प्रक्रिया करपाचें काम उरला. मुरगांव आनी पणजे डंपांत विलो लावपाची प्रक्रिया चालू
आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
