भांगरभूंय | प्रतिनिधी
पणजी : धोकादायक स्थितींतल्या पालसणांचो अभ्यास आनी ताचेर उपाय येवजण करपा खातीर पयल्या पांवड्यार 3 कोटी 20 लाख रुपयांच्या खर्चाचो अदमास आसा. पालसाणां विशीं दोन वर्सां पयली समितीन जो अहवाल सादर केला, तातूंत ह्या अदमासीत खर्चाचो आस्पाव आसा.
आपत्ती वेवस्थापन समितीची मुख्यमंत्र्यांनी बिरेस्तारा बसका घेतली. धोकादायक स्थितींतल्या पालसाणां विशीं समितीन सादर केल्ल्या अहवालाचो नियाळ बसकेंत घेतलो. अहवालांतल्या शिफारशींची कार्यवाही करपाचो निर्णय बसकेंत जाला.
पालसाणां कोसाळपाचीं कारणां आनी उपाय येवजणेचो अभ्यास करपा खातीर 90 लाख रुपया खर्च येतलो. मॅपींग, झोनींग करून अहवाल तयार करपा खातीर वर्साक 30 लाख रुपया लागतले. दरेका म्हालाक 2 लाख रुपया खर्च येवपाचो अदमास आसा.
आपत्तीची पूर्वकल्पना मेळपा खातीर अर्ली वॉर्नींग सिस्टम विकसीत जातली. दरेका म्हाला खातीर 10 लाख खर्च येतलो. हाचेर 1 कोटी 20 लाख रुपया खर्च जातले. आपत्तीची पूर्वकल्पना दिवपी यंत्रणा तयार करतले, अशें मुख्यमंत्र्यांनी बसके उपरांत स्पश्ट केलें.
आपत्ती पासून सुरक्षा उपायां विशीं मामलेदार, तलाठी, रान खात्याचे अधिकारी हांकां प्रशिक्षण दितले. 25 जाणांचो एक पंगड अशा 12 पंगडांक प्रशिक्षण दितले. प्रशिक्षणाचेर 1 कोटी रुपया खर्च जातले.
थळाव्या लोकांचे मजतीन सुरक्षेच्या उपाय येवजणे खातीर 10 लाख रुपया खर्चाचो अदमास आसा. आपत्तीचो मार बशिल्ल्या लोकांक मजत करपा खातीर 50 लाख रुपयांची गरज पडटली. सगळे मेळून तीस वर्सां खातीर 3 कोटी 20 लाख रुपया लागतले. आपत्ती वेवस्थापनाचे बसकेंत खर्च तशेंच हेर गजालींचेर सादरीकरण जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
