भांगरभूंय | प्रतिनिधी
वेदीक शिक्षण वेवस्थेंत शिक्षकांक गुरू मानताले. गुरुकुलाक हाजीर रावपी विद्यार्थ्यां कडल्यान उच्च आदर तशेंच तांच्या पालकां कडल्यान गुरूंक उच्च आदर दिताले. गुरूक एक सर्वोच्च अधिकार मानताले. विद्यार्थ्यांक शिश्य म्हणटाले. गुरुकुलांत जें कितें शिक्षण घडटालें तें सगळें सामकें गंभीरतायेन घेतालें. हांगा भुरग्यांच्या एकंदर विकासाचेर लक्ष केंद्रीत केल्लें. पालकां विशीं उलयतना मागीर पालक गुरूचेर विस्वास दवरताले आनी गुरुकुल नॉर्म्स पालन जाताले.
एकदां भुरगो गुरुकुलांत शिकपाक लागलो म्हणटकच भुरग्याक शिश्य मानताले. ह्या शिश्य टप्प्यांत पालकान शाळेचे खंयचेच शिकवणेंत हस्तक्षेप केलो ना. भुरग्याक गुरुकुलाच्या नेमांक पाळो दिवपाक कडक आचारसंहिता दिली. पालकांनी विस्वास दाखोवन भुरग्यांचे उदरगतीचेर चड परिणाम जालो खरो.
भुरगो पालकां कडल्यान समाजिकीकरणाचो एक भाग म्हूण शिकता देखून भुरगो गुरू आनी गुरुकुल नेमांकूय आदर दितालो. समाज पारंपारीकांतल्यान आधुनिकांत बदलला. ह्या आधुनिकीकरणाच्या टप्प्यांत शिक्षण वेवस्थेंतय जायते बदल घडल्यात.
समाजशास्त्र, शिक्षण ही एक समाजीक संस्था अशें मानतात. गिन्यान दिवपाचो हेतू परस चड शिक्षणीक संस्थाची समाजीक भुमिका आसा. समाज सशक्तीकरणा खातीर शिक्षण खूब गरजेचें आसा. जितले चड लोक शिक्षण घेतात, तितली तांकां जागृताय आसता. शिक्षण दिवपांत शिक्षकांची म्हत्वाची भुमिका आसता. शिक्षक फकत गिन्यान दिना पूण विद्यार्थ्यां मदीं नैतीक मुल्यां रुजयतात. समजून घेवप आनी शिक्षकांच्या वावराची कदर करप हें आमचें कर्तव्य.
पालकांक शिक्षकांची भुमिका योग्य रितीन समजून घेवपाची गरज आसा. शाळेचो निमाणो हेतू कितें? भुरग्यां भितर शिस्त निर्माण करप. पयलीं शिक्षक स्वता शिस्तबद्द आसतात आनी ते सदांच विद्यार्थ्यां कडेन आदर्श वागणूक दाखोवपाचो यत्न करतात. आमी म्हणूं येता शिक्षक सदांच यत्न करतात आपल्या विद्यार्थ्यां खातीर आदर्श जावपाक.
1) शाळेचे नेम प्रखरपणान पाळप
2) वेवस्थीत वेशभुशा आसप
3) विद्यार्थ्यां कडेन संवाद सादतना योग्य आनी सभ्य भास वापरप.
4) विद्यार्थ्यांची हाजेरी खरपणान दर दिसा घेवप आनी पालकांक माहिती दिवप.
5) विद्यार्थ्यांक वेळावेळार काळजीपूर्वक सुचोवण्यो दिवप.
6) विद्यार्थी चुकल्यार ख्यास्त दिवप, जाका लागून ते धडो शिकतात. तीच चूक परतून परतून जावची न्ही म्हणून.
शिक्षक हें कितें तरी मोल दिवपाचें कार्य आसा. आपल्यो सगळ्यो समस्या कुशीक दवरून शिक्षक सदांच वर्गांत आपलें तोंड खुशाल दवरतात. वर्गांतल्या विविध गरजांक आदर दिवप आनी समजून घेवन, शिक्षक, आपली शिकोवपाची शैली डिझायन करता. वर्गांतल्या विविध गरजांक समजून घेवप हाचेर शिक्षक चड प्राधान्य दिता.
शिक्षकांनी केल्लें सगळें उल्लेखनीय योगदान आसून लेगीत जायते फावटी तांकां पालकां कडल्यान उणें सहकार्य मेळटा. पालकां कडल्यान समजूत नाशिल्ल्यान शिक्षकांक येवपी समस्या सकयल दिल्यात-
1) शाळेंतल्या विद्यार्थ्यांचे वागणुके संबंदी वेळावेळार संवाद सादपाचो उणाव.
2) शिक्षकांचेर विस्वास नासप.
3) स्वता भुरग्या कडेन ‘बायस’ रावप आनी आपल्या भुरग्याची चूक मानप ना.
4) शिक्षकां कडल्यान सुचोवण्यो नकारात्मक घेवप.
आनीक अश्यो कितल्योश्योच समस्या आसात. आयज अशी परिस्थिती कित्याक निर्माण जाता? कांय भुरगीं चुकतात तेन्ना शिक्षकांनी आनी पालकांनी तांकां बरें मार्गदर्शन दिवचें. भुरग्याक योग्य वेळार योग्य मार्ग दाखोवप म्हत्वाचें.
एक सोद सिद्धांत कितें म्हणटा पळोवया-
Operant conditioning:- बी. एफ. स्किनरान हो सिद्धांत तोखणाय आनी ख्यास्त हांच्या आदारान शिकपाचो एक मार्ग म्हूण मांडलो. इन्स्ट्रुमॅण्टल कंडीशनिंग अशेंय म्हणटात. वागणुकेक लागून तोखणाय आनी ख्यास्त वापरतात ती शिकपाची पद्दत.
ही विचारसरणी भुरग्याच्या आनी शिक्षकाच्या संबंदानूय लागू जाता आनी पालकाची भुमिका स्पश्ट जाता. जेन्ना जेन्ना भुरगो चूक करता तेन्ना शिक्षक भुरग्याक ख्यास्त दिता वा पालकांक कळयता, तेन्ना हेतू फकत भुरग्याची वागणूक दुरुस्त करपाचो आसता. अशा प्रकरणांत पालकांनी शिक्षकान घेतिल्लें पावल बरोबर न्ही अशे म्हणटकीर, मागीर भुरग्याची शिक्षका विशीं नकारात्मक प्रतिमा तयार जाता.
शिक्षक आनी पालक हांचे मदीं पूल बांदपाचें काम आनी मध्यस्थी करपाचें कार्य करता पालक – शिक्षक संघटना. पालक शिक्षक संघटना ही पालक आनी शिक्षक हांचो आस्पाव आशिल्ली संस्था. शिक्षकांचें मुल्यांकन करपाच्या हेतान आनी जिवीत आनी कार्यप्रदर्शनाचे वाठार, सांस्कृतीक, शिक्षणीक, समाजीक आनी नैतीक सुदारपाचे मार्ग सोदपाच्या हेतान हे दोनूय गट मेळटात.
पीटीए मुखेलपणान विद्याथ्याचें कल्याण आनी शिक्षण लक्षांत घेवन मुळाव्या कारणा खातीर तयार जाता. पालक आनी शिक्षक बरे शिकिल्ले, सहकारी आनी परिपूर्ण वागपी तरणाटे नागरीक घडोवपाच्यो पद्दती आनी साधनांचो अभ्यास करतात. पालक आनी शिक्षक दोगांय दर एका भुरग्याची क्षमता विकसीत करपाचे प्रभावी मार्ग सोदतात.
शाळेचो हेतू साकार करूंक मदत करपा खातीर पालक कांय म्हत्वाचीं भुमिका करतात. एक सकारात्मक टीप घेवन आमी सगळे एकठांय एक पावल उबारुया. भुरग्याची वागणूक मोल्डिंगाची जापसालदारकी शिक्षक आनी पालकांनी मेळून घेवया, हाची खात्री करपाक आनी बरो फुडार करपाक. घरांतले पालक आनी शाळेंतले शिक्षक एकठांय येवन भुरग्यांक जिणेंत येस मेळोवपाक तयार करपाची गरज आसा. एके वटेन शाळांनी भुरग्यांक समाजाचे मोगाळ, आदरणीय
आनी जबाबदार व्यक्ती जावपाक तयार करपाची आपली जापसालदारकी
पाळपाची गरज आसा. दुसरे वटेन पालकांनी शिक्षकांक ही जापसालदारकी पुराय
|करपाक, भुरग्यांक घरांत तयार करून मजत करपाची गरज आसा. हाचे वयल्यान
शिकपाक बुनयाद दिवपाक शिक्षक आनी पालक दोगांयचीय म्हत्वाची भुमिका साकार जातली.
कात्यायनी घाटवळ
99752 93808
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
