भांगरभूंय | प्रतिनिधी
भांगरभूंय । प्रतिनिधी
काणकोणः वाचनान बुद्धिमत्ता वाडटा. बुद्धींत गिन्यानाची भर घालपा खातीर वाचनाची सामकी गरज आसा. नवी पिळगी कांय वाचना अशें म्हणटात. मात पालकांनी वाचन केल्यार तांची भुरगीं वाचनात रुच दाखयतलीं असें लेखक आनी प्रकाशक कमलाकर म्हाळशी हाणे सांगलें.
संवसारीक पुस्तक दिसा निमतान काणकोणच्या सरकारी वाचपघरान देवाबाग हांगच्या क्षत्रीय कोमरपंत समाजाच्या धाल पुरुस सभाघरांत आयोजीत केल्ले पुस्तक दीस कार्यावळींत ते उलयताले. माचयेर लेखिका प्रा अकल्पिता राऊत देसाय, अमिता देसाय, नंदकिशोर फळदेसाय, उदय नायक आशिल्ले. काणकोणचें रवींद्र भवनाचें काम पुराय जातगीर देवाबाग हांगा आशिल्लें वाचपघर थंय व्हरतगीर ताचो चड वाचकांक लाब जातलो अशें सागून वाचपघरांक दोन ग्रंथपाल नियुक्त करपाची मागणी म्हाळशी हांणे केली.
ह्या वेळार 5 तें 10 वर्सां पिरायेच्या भुरग्यां खातीर घेतिल्ले चित्रकला सर्तींत केनियल फर्नांडीस, जोश फर्नांडीस आनी राजदीप देसाय हांका इनामां फावो जाली. 11 तें 15 वर्सां पिरायेच्या भुरग्यां खातीर ,सैम ह्या विशयाचेर घेतिल्ले चित्रकला सर्तींत तनिशा नमी गांवकार, राघव सावंत आनी वामन सतरकार हांणी इनामां मेळयलीं. सर्तीचें परीक्षण तुषार नायक आनी संजू पागीन केलें. सूत्रसंचालन आनी प्रास्तावीक ग्रंथपाल प्रकाश गांवकारान केलें.
———————————————————–
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
