पालकांनी खेळांतूय भुरग्यांक उर्बा दिवची

भांगरभूंय | प्रतिनिधी

डॉ. दिव्या राणेः केरी सत्तरी फुटबॉल सर्तीचें उक्तावण

भांगरभूंय । प्रतिनिधी

केरी- सत्तरीः खेळ सगळ्यांक एकठांय दवरता. ताका लागून शिक्षणा वांगडा खेळां मळ लेगीत म्हत्वाचें आसा. ताका लागून पालकांनी आपल्या भुरग्यांक खेळांतूय उर्बा दिवची, अशें पर्येंची आमदार डॉ. दिव्या राणे हांणी सांगलें.

केरी सत्तरीच्या सरकारी माध्यमीक विद्यालयाच्या मैदानाचेर युनायटेड शिरोलीयन्सा वतीन आयोजीत केल्ले ‘युनायटेड शिरोलियन्स सुपर लीग 2022’ फुटबॉल सर्तीच्या उक्तावण सुवाळ्यांत डॉ. राणे उलयताली. ह्या वेळार नाचयेर जिल्हो पंचायत वांगडी देवयानी गांवस, केरीची सरपंच दीक्षा गांवस, मोर्लेचे सरपंच अमीत शिरोडकार, केरीचे उपसरपंच भिवा गांवस, शिरोलीचे पंच श्रीपाद गांवस, पंच तन्वीर पांगम, संदीप ताटे, राजू गांवस, उस्मान सय्यद, नंदिता गांवस आनी सुप्रिया गांवस तशेंच युनायटेड शिरोलियन्सचे अध्यक्ष ओंकार गांवस, सचीव गितेश गांवस, यशवंत गांवस आनी महेश गांवस हाजीर आशिल्ले.

गांवगिऱ्या वाठारांत लेगीत खेळां कुशळटाय आसा. योग्य प्रशिक्षक आनी साधन सुविधा मेळ्ळी जाल्यार खेळगड्यांक चड संद मेळपाक शकतली. शारा वरींच गांवगिऱ्या वाठारांत लेगीत फुडारांत विवीध साधन सुविधा निर्माण करतले, अशें डॉ. राणे हांणी सांगलें.

ह्या वेळार देवयानी गांवस, दीक्षा गांवस, अमीत शिरोडकार आनी श्रीपाद गांवस हांणी आपले विचार मांडले.

यशवंत हांवस हांणी सुत्रसंचालन केलें आनी उपकार मानले. हे सर्तींत वट्ट आठ पंगडांनी वांटो घेतला. 27 नोव्हेंबराक फायनल मॅच जातली. ते उपरांत सर्तीचीं इनामां भेटोवपाचो सुवाळो जातलो. प्रिमियर लीग खातीर भलायकी मंत्री विश्वजीत राणे आनी पर्येची आमदार डॉ. दिव्या राणे हांचो विशेश आदार मेळ्ळा.

फुटबॉल प्रिमियर लिगेंतले पंगड

फुटबॉल प्रिमियर लीग सर्तींत मिलिंद राणे हांचो राणे वॉरियर्स, ज्ञानेश्वर शेटकार हांचो युनायटेड शिरोलियन्स, कृष्णा गांवस हांचो गोल्डन नायट्स, आकाश राणे हांचो व्ही फॉर किंग्स, सुरेंद्र हिंदे हांचो हिंदे ब्रदर्स, उल्हास गांवस हांचो सांतेरी युनायटेड, अ‍ॅड. तुकाराम गांवस हांचो पींक पँथर आनी संदीप केसरकार हांचो स्वनीक वॉरियर्स अश्या आठ पंगडांनी वांटो घेतला. सर्तींतली फायनल मॅच 27 नोव्हेंबराक जातली.