भांगरभूंय | प्रतिनिधी
गोंय पुलिसां कडल्यान पार्सलाटे मॅसेजी विशीं अॅडवायजरी
भांगरभूंय । प्रतिनिधी
पणजी : पार्सला विशीं बनावट संदेश धाडून पयशें लुटपाचे प्रकार चालू आसात. पार्सलाच्या संदेशा पसून लोकांनी सादूर रावचें, अशी अॅडवायजरी पुलिसांनी जारी केल्या. पार्सलाच्या संदेशाक बळी पडून दोगां जाणांचे पयशे गेल्यात. हाका लागून सादुरताय बाळगुपाची अॅडवायजरी पुलिसांनी जारी केल्या.
अर्दवट म्हायतीक लागून तुमचें पार्सल पावोवप शक्य जायना. ह्या लिंकार क्लीक करून पत्तो धाडात आनी डिलीवरी शुल्क फारीक करात, असो संदेश मोबायलाचेर येता. कार्डाची म्हायती दिल्यार तुमचे पयशें वचपाची भिरांत आसा. हाका लागून असो संदेश आयल्यार 1930 ह्या नंबराचेर पुलिसांक म्हायती दियात. अनवळखी लींक क्लीक करू नाकात. बँकेचें खातें, ओटीपी वा पत्तो धाडूं नाकात, अशी अॅडवायजरी पुलिसांनी जारी केल्या.
अशा बनावट संदेशाक लागून एके बायलेचे आनी दादल्याचे पयशे बुडल्यात. पोस्टाचें पार्सल धाडपा खातीर लिंक क्लीक करपाचो संदेश एके बायलेक आयलो. लिंकाचेर क्लीक केले उपरांत तिचे 25,782 रुपया गेले.
तशेंच एका दादल्याक कुरियर घेवपा खातीर लिंकाचेर क्लीक करपाचो संदेश आयलो. लिंकाचेर क्लीक केले उपरांत ताणें ओटीपी धाडलो. ताच्या खात्यांतल्यान 85,238 रुपयांचो वेव्हार जालो. ताचे 85,238 रुपया गेले.
507 वॅबसायटी, 767 मोबायल नंबर ब्लॉक
पुलिसां कडल्यान अंदूंच्या वर्सा गैरवेव्हार करपी 507 वॅबसायटी आनी 767 मोबायल नंबर ब्लॉक केल्यात. हातूंत 151 सोशल मिडिया आकावंट आनी 2 मोबायल अॅपांचो आस्पाव आसा. सायबर गुन्यांव फांट्याचे पुलीस अधिक्षक राहूल गुप्ता हांणी ही म्हायती दिली. बनावट पार्सल डिलिवरी, ऑनलायन गुंतवणूक फ्रॉड, सेक्सटॉर्शन आनी डेटींग अॅप, डिजिटल अॅरेस्ट, बनावट हॉटेल बूकींग पोर्टल हांचो हातूंत आस्पाव आसा. एकाच मे म्हयन्यांत 258 वॅबसायटी ब्लॉक केल्यो. हाचे उपरांत जानेवारींत 78 जाल्यार जूनांत 72 वॅबसायटी ब्लॉक केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
