भांगरभूंय | प्रतिनिधी
पार्थ साळुंखे युवा संवसारीक वस्तादपण सर्तीचे रिकर्व्ह गटांत भांगरा पदक जिखपी भारताचो पयलो दादलो नेमबाज थारलो. भारतान सर्तींत वट्ट 11 पदकां जिखलीं. युवा संवसारीक वस्तादपण सर्तींत आतां मेरेनचें भारताचें हें सर्वोत्कृश्ट प्रदर्शन आसा.
महाराष्ट्राच्या सातारांतल्या 19 वर्सां पिरायेचो पार्थ हाणें कोरियाच्या नेमबाजाक हारयलो. रॅंकिंग फेरयेंत पयले सुवातेर आशिल्ल्या पार्थ हाणें सातव्या मानांकीत सोंग इंजूनाक पांच सेटांनी 7-3 (26-26, 25-28, 28-26, 29-26, 28-26) हारयलो. साळुंखेन 10तले 10 गूण मेळोवपी दोन जाल्यार 10तले 9 गूण मेळोवपी एक नेम सादलो.
भारतान सर्तींत स भांगरा पदकां, एक रुप्या पदक आनी चार कांश्या पदकां जिखलीं. पयली सुवात कोरियान जाल्यार दुसरी सुवात भारताक फावो जाली. कोरियान स भांगरा पदकां आनी चार रुप्या पदकां जिखलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
