भांगरभूंय | प्रतिनिधी
नेण्टे पिरायेच्या दोगी चलयांचेर कळंगूटच्या एका हाॅटेलांत लैंगीक अत्याचार जाल्ल्याची घडणूक उक्तडार आयल्या. ताचे वयल्यान आमची तरणाटी पिळगी, पर्यायान गोंय खंयचे दिशेन चल्लां, तें कळटा. आगशेच्यो ह्यो चलयो बेपत्ता आशिल्ल्यो. 15 आनी 13 वर्सां पिरायेच्यो दोन भयणी आनी तिसरी 11 वर्सांची तांची इश्टीण. दोन कागाळी आयिल्ल्यान पुलिसांनी तंत्रज्ञान आनी थळाव्यां कडेन चवकशी करून हाॅटेलाची तपासणी केली तेन्ना दोन कुडींनी ह्यो चलयो सांपडल्यो. तांचे वांगडा दोग तरणाटे आशिल्ले. एकलेचो वाडदीस मनोवपाक ह्यो दोन चलयो गेल्ल्यो. वांगडा 11 वर्सांचे आपले इश्टीणीक घेवन. त्यो स्वता गेल्ल्यो काय ह्या तरणाट्यांनी तांकां व्हेल्ल्यो, तें कळटलें. पोक्सो कायद्या खाला गुन्यांव नोंद जातलो. हें प्रकरण मिट्टलें काय ह्या तरणाट्यांक खास्त जातली, तेंय कळटलेंच.
हे तरणाटे आपणाक हाॅटेलांत व्हरतात, मागीर रुम बूक करतात, हें कळटकच ह्यो चलयो आड्डूंक नात कित्याक, नेण्ट्या चलयांक घेवन दोग जाण हाॅटेलांत आयल्यात, हाचो रिसेप्शनिश्ट, वेवस्थापकाक मात्तूय दुबाव कसो आयलो ना, ह्या चलयांनी घरा फोन करून कित्याक कळोवंक ना. त्या दोनूय तरणाट्यांक पोक्सो कायद्याचो भंय ना काय तांकां तो खबरूच ना? बऱ्याच तरणाट्यांक कितें केल्यार कितें जावं येता, कितली ख्यास्त जावं येता, हाची खबर नासता. कायद्याचें गिन्यान नासता. मागीर तांचे कडल्यान गुन्यांव घडटात आनी ते त्रासांत पडटात. देखून पुलिसांनी येरादारी जागृताय करतात, तशी हेर कायद्यां विशीं, गुन्यांवां विशीं हायस्कुलांनी जागृताय करपाक जाय. तसो वेळ आयला.
पिनेवालों को पिने का बहाना चाहीए… हे धर्तेर गोंयांत पार्टी सदांच जाता. वाडदीस, फ्रेंडशीप डे, व्हॅलेंटायन डेच्या नांवा खाला नेण्टी भुरगीं पसून हाॅटेलांनी वचून मजा करतात. पबांतल्यान मध्यानरातीं येतना 17- 18 वर्सांच्या भुरग्यांक अपघातांत मरण येवपाच्यो घडणुको हांगा घडल्यात. इश्टां मदीं तर आतां मजा करपाची फॅशनूच आयल्या. सहल, घसघसो, दर्यावेळ, फार्म हावस, पब हें आतां सगलेच अणभवपाक लागल्यात. नेण्ट्या भुरग्यांचेर इश्टांचें चेपण आसता. गैरवर्तन करपीय इश्ट आसतात. भुरग्यांचे सुरक्षे विशीं तर बेफिकीरी दिसता. गोंय हें आधुनीक, पर्यटन राज्य आसलें, सगल्यांक आचार- विचार स्वातंत्र्य आसलें म्हूण मनाक येता तें करप कायद्यांत बसना, हें आमकां केन्ना कळटलें?
प्रत्येक गजाल ‘सिलेब्रेट’ करपाकूच जाय, नाजाल्यार तो तरणाटो गांवढळ, भिकाड्डो, शिवराक बाप्पा असो एक समज तरणाट्यां मदीं पातळ्ळा. कांय कारणाक लागून पयशे मोडपाक अनमनपी इश्टाक ते सरळ कुशीक उडयतात वा थोमणे मारतात. मागीर इश्टांच्या चेपणाक लागून चुकीच्या मार्गान वचपी, खंयच्यान तरी पयसो हाडून तो मोडपी तरणाटे तयार जातात. नितीमुल्यांचो उणाव, पालकांची आडनदर, सोशल मिडियाचो प्रभाव, समाजांतले नवे आदर्श (जे भरपूर पयशे मोडटात) हांकां लागून समाजीक स्थिती बदल्ल्या. आचार- विचार स्वातंत्र्याच्या नांवा खाला म्हाका जाय तें करपाचो हक्क आसा, अशें समजुपी पिळगी तयार जाल्या. ती कोणाचें आयकुपाचे मनस्थितींत नासता. अदीं मदीं एन्जाॅय केल्यार कितें जाता, अशें विचारपी तरणाटेय आसात. नेण्ट्या चलयांक, चल्यांक मात्शें भुलयत जाल्यार तीं त्या मनशाक बळी पडटात. कांय जाणां मदीं परिपक्वतेचो उणाव आसता. हेच पिरायेचेर खास करून चलयो कोणाच्याय मोगांत पडटात. साबुदीर यो मेरेन खूब उशीर जाल्लो आसता. सिनेमा, टिव्ही माळो, ओटीटी, सोशल मिडिया हांच्या प्रभावानूय वाट चुकिल्लीं बरींच भुरगीं आसात. नेण्ट्यां चलयांक फटोवपाक सोंपें हें खबर आशिल्ले धूर्त तरणाटे आपलें रुप, पयसो, झेत, भपको, गाडी, येशस्वी पालकांचें नांव, आडनांव वापरून मोगा फाटल्यान मोग करीत रावतात. नेण्ट्योच न्हय, तर हेर तरणाट्यो चलयो पसून हाका बळी पडिल्ल्याचीं कितलींशींच उदाहरणां समाजांत आसात.
ह्या सगल्याक आळाबंद हाडटलो जाल्यार पालकांनी जागृत रावंक जाय. सोयरीं, शेजारी, समाजानूय हे बाबतींत मजत करपाक जाय. पार्टेक वा हेर कडेन कोण, कोणा वांगडा, खंय वता ताचेर लक्ष जाय. सोशल मिडिया वापराचेर नदर दवरूंक जाय. नेण्ट्यां भुरग्यांक पयस खंय वचपाक दिना जाल्यार चड बरें. भुरग्यांनीय पालकांचो विस्वासघात करपाक जायना. 3- 4 चलयो मेळून लायब्ररींत वता म्हूण सांगून भलतेच कडेन वचपाचे प्रकारूय घडूं येतात.
पालकां कडेन भरपूर पयसो आसा, जाल्यार सिलेब्रेशन करचें, पूण थंय सुरक्षीतताय म्हत्वाची. पार्टी दिवपा फाटलो हेतू योग्य आसचो. संस्कार आसूंक जाय. खास करून आवयांनी आपल्या चलयांक धोक्याची जाणीव करून दिवंक जाय. मर्यादेन वागप, जापसालदारकी, परिणाम हें कुटुंबांत रुजवणाक घालप गरजेचें. गुन्यांवकारीच्या, भ्रश्टाचाराच्या मार्गान आपल्या घरांत पयसो येता, हें बऱ्याच बायलांक, चलयांक, चल्यांक खबर आसता. पूण तांकां ताचें कांयच दिसना जालां. तो खायना? हो तांचो ताचेर प्रस्न. ही मानसीकताय खूब भयानक. समाजाच्या सगल्या थरांनी ती आयज रुजल्या. दुबाव ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
