भांगरभूंय | प्रतिनिधी
पणजी : हणजुणच्या पर्पल मार्टिनी रेस्टॉरंटांत पार्किंगा वेल्यान जाल्ल्या वादळाक लागून उत्तर प्रदेशांतल्या इलाहाबाद न्यायालयाची नागरी न्यायाधीश दिपांशी चौधरी आनी तिचो घोव नितीन लाल तशेंच रेस्टॉरंट धनी समर्थ सिंगल हांणी हणजूण पुलीस स्टेशनांत एकामेका आड कागाळी दाखल केल्यात. ही घडणूक शुक्रारा सांजेवेळार साडे स वरांचेर घडली, दोनूय कागाळी रातीं उसरां नोंद जाल्यात.
न्यायाधीश दिपांशी चौधरी हांणी दिल्ले फिर्यादी प्रमाण, वादा मजगतीं दुबावीत अमित मिश्रा आनी सुरक्षा रक्षकांनी तांकां आनी तांच्या घोवाक वायट उतरां दिलीं. उपरांत तांकां धुकल्ले, तशेंच न्यायाधीश चौधरी हांच्या आंगार हात घातिल्ल्याचो यत्न केल्ल्याचो आरोप केलो. तशेंच गंभीर परिणामांची धमकी दिवन तांकां रेस्टॉरंटांतल्यान जबरदस्ती भायर काडलीं. अशें तांणी पुलिसांक सांगलें. हे कागाळीवेल्यान हणजूण पुलिसांनी भारतीय न्याय संहितेच्या कलम ७४, ११५(२), ३५२ आनी ३५१(३) सह ३(५) खाला गुन्यांव नोंद केला.
याउलट रेस्टॉरंट धनी समर्थ सिंगल हांणी दिल्ले फिर्यादी प्रमाण, न्यायाधीश दिपांशी चौधरी आनी तांचो घोव नितीन लाल हांणीच रेस्टॉरंटच्या कर्मचार्यांक वायट वागणूक दिली. तांणी कर्मचार्यांक वायट उतरां दिवन धमकायलें, अमित मिश्रा आनी पॉल ह्या कर्मचार्यांक आडावन त्रास दिले, असो तांचो आरोप आसा. हे कागाळीवेल्यान पुलिसांनी भारतीय न्याय संहितेच्या कलम ३५२ आनी १२६(२) सह ३(५) खाला दुसरो गुन्यांव नोंद केला.
ह्या दोनूय प्रकरणांत हणजूण पुलिसांनी तपास सुरू केला, नेमकें कितें जाल्लें हाचो सोद पुलीस घेतात
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
