पारंपरीक नुस्तेमारी फाल्यांच्यान सुरू
भांगरभूंय | प्रतिनिधी
मडगांवः बाणावले वाठारांतल्या पारंपरीक नुस्तेकारांनी प्रार्थना केले उपरांत दर्यांत बोटी घालून रापण उडोवन नव्या हंगामाची सुरवात केली. 1 ऑगस्टाक नुस्तेमारी बंदी काडले उपरांत हवामानाचो अदमास लक्षांत घेवन बोटी खोल दर्यांत सोडटले अशें पारंपरीक नुस्तेकारांनी स्पश्ट केलें.
पावसाच्या दिसांनी बोटींक दर्यांत वचपाक बंदी आसता, देखून बंदी उपरांत नुस्तेकार दोन म्हयने आपलो वेवसाय बंद दवरतात. जून म्हयन्यां सावन नुस्तें मारीचेर आशिल्ले निर्बंध ऑगस्टांत काडटले. हे फाटभुंयेर कुटबण जेटी सयत दक्षीण गोंयच्या वेगवेगळ्या दर्यादेगांचेर नुस्तेकारांची आयज गर्दी दिसून आयली. कुटबणां बोटींची दुरुस्ती, कामगारांक गरजेचें सामान, रांदपाचीं आयदनां, बोटींवयल्या जाळीं देखरेख आनी दुरुस्त करपाचें काम चलता.
शेनवारा सकाळीं बाणावले दर्यादेगेर पारंपरीक नुस्तेमारांनी बोटींची पुजा केली. ह्या वेळार नुस्तेकारांक ह्या हंगामांत बरें नुस्तें मेळचें आनी कसलीच अप्रिय घडणूक घडची न्हय अशें धर्मगुरुंनी मागणें केलें. बाणावले दर्यादेगेर नुस्तेमारांनी दिल्ले म्हायती प्रमाण ऑगस्टांत हंगाम सुरू जाले उपरांत लेगीत फुडल्या सप्तकाचो हवामान आनी दर्याचो अदमास लक्षांत घेवन बोटी सोडटलें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
