पायलट विमानतळाच्या बोर्डींग गेटीचेर बेशुद्ध
भांगरभूंय | प्रतिनिधी
भांगरभूंय । खबरां संस्था
नागपूर: नागपूर विमानतळा वयल्यान पुण्याक येवपाक विमान तयार जाल्लें. प्रवासी विमानांत बसपा खातीर गेल्ले. विमानाचो पायलटूय आयिल्लो. पूण तो विमानतळाच्या बोर्डींग गेटीचेर पावलो आनी सकयल कोसळ्ळो. अचकीत जाल्ले हे घडणुकेंत बरोच बोवाळ जालो. रोखडोच त्या पायलटाक हॉस्पीटलांत दाखल केले. पूण डॉक्टरांनी ताका मरण आयिल्ल्याचें सांगलें.
इंडिगोच्या अधिकार्यांनी दिल्ले म्हायती प्रमाण, कॅप्टन मनोज सुब्रमण्यम बिरेस्तारा सदां भशेन कामाक आयिल्ले. तांचेर नागपूर-पुणे ह्या फ्लायटाची जापसालदारकी आशिल्ली. विमान बोर्ड जावचे पयलीं ते पायलट बोर्डींग गेटी लागसारा कोसळ्ळे. विमानतळा वयल्या ग्रावंड स्टाफाचे मजतीन तांकां रोखडेच हॉस्पिटलांत व्हेले. हॉस्पिटलांत डॉक्टरांनी तपासणी केल्या उपरांत तांकां मरण आयिल्ल्याचें स्पश्ट जालें.
हॉस्पिटलांतल्या सुत्रांनी मनोज सुब्रमण्यम हांच्या मरणाचें कारण काळजा आताक आशिल्ल्याची शक्यताय उक्तायल्या. हे विशीं हॉस्पिटलाचे प्रवक्ते एजाज शमी हांणी सुब्रमण्यम हांच्या मरणाचें कारण पोस्टमोर्टेमा उपरांत कळटलें अशें सांगलें.
मजगतीं, पायलटाक अचकीत मरण आयिल्ल्याची ही तिसरी घडणूक घडल्या. हातूंत दोग भारतीय पायलट आसात. ह्यान पयलीं दिल्लीच्यान डोहा वचपी कतर एअरवेजच्या पायलटाक फाटल्या सप्तकांत मरण आयिल्लें. पायलटांक अचकीत आयिल्ल्या मरणाच्यो घडणुको वाडतूच आसा. तशेंच पायलटांनी नेमान भलायकी तपासणी करपाची गरज उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
