भांगरभूंय | प्रतिनिधी
देश स्वतंत्र जावन 77 वर्सां जायत आयलीं, तरी गरिबी ना जावपाचें नांव घेना. कोरोनाच्या दोन वर्सांच्या काळांत तर मध्यमवर्गीय जाल्लीं कुटुंबां पसून परत गरीब जालीं. आमच्या देशाची लोकसंख्या चड आशिल्ल्यान गरिबी काबार करप सोंपेपणी शक्य जायना. ते खातीर सरकारां पयलीं सावन मुफत अन्न, तांदूळ, मदले सुटयेंतलें खाण, मुफत बियाणें…. अश्यो जायत्यो येवजण्यो, अनुदान, सवलती लोकांक दीत आसा. रेशनकार्डाचेर उण्या मोलांत धान्य मेळटा, हाॅस्पिटलांनी मुफत उपचार मेळटात. गरिबांक तांचे जिणेंत थाकाय मेळची म्हूण देशभरांतलीं सरकारां आपापले परीन वावुरतात. पूण येवजण्यो, अनुदानां, सवलतींचो गैरफायदो घेवपी लाखांनी लोक आमच्या देशांत आसात. खावन, पिवन सुसेगाद जगपाची तांक आशिल्लीं कुटुंबां पसून गरिबां खातीर आशिल्ल्या येवजण्यांचो लाव घेतात. अशें केल्ल्यान जे खरेंच गरीब आसात, तांचेर अन्याय जाता. ह्यो येवजण्यो चालीक लावपी अधिकारीय करामती करतात. ताचो मनस्ताप लाबार्थ्यांक जाता.
मुरगांव मतदारसंघांतले एके बायलेक फाटोफाट तीन म्हयने गृह आधार येवजणेचो फायदो मेळ्ळो. पयशे येवपाचे बंद जाले, तेन्ना तिणें चवकशी केली, तर लाबार्थी बायलेक मरण आयलां, अशें तिका सांगलें. गृह आदार, लाडली लक्ष्मी येवजण्यांचें बरेच अर्ज प्रलंबीत आसात. ते रोखडेच हाता वेगळे करपाची हमी बायलां आनी भुरगीं उदरगत मंत्री विश्वजीत राणे हांणी दिल्या. हे अर्ज कोणाचे ताचीय चवकशी करप गरजेचें. कारण सवलत, अनुदान, येवजण्यांच्या रुपांत मेळटा तो पयसो लोकां कडल्यान एकठांय केल्ल्या टॅक्सांतल्यान दितात. म्हणटकच ताचो योग्य तो उपेग जावंक जाय. कांय लोकांच्या मतान, जो पक्ष सत्तेर येता, ताच्या वावुरप्यांक वा वावुरप्यांच्या लागींच्या लोकांक येवजण्यो मेळटात. कांय कडेन स्वता लोकप्रतिनिधी आपल्या मतदारांक त्यो मेळोवन दितात. हरकत ना. पूण येवजण घेवपी व्यक्ती तिका पात्र आसपाक जाय. घरांत दोन मोटारी, चार स्कुटरी आशिल्लो, बिराडां दवरिल्लो मनीस गृह आधार येवजण घेता, तें योग्य न्हय. हें आतांच न्हय, तर 40 वर्सां पयलीं पसून दिसलां. सरकारी नोकरांच्या भुरग्यांक अर्थीक नदरेन मागासां खातीर काॅलेजीच्या शुल्कांत सवलत मेळनाशिल्ली. पूण तांचे परस चार पटीन जोडपी वेवसायिकांच्या भुरग्यांक ती मेळटाली. ताका लागून येवजण्यो, सवलती नेमक्यो कोणाक मेळटात, ताचो नियाळ घेवप गरजेचें.
पंचायती, पालिकांनी गांवांत जांकां सरकारी सवलती, येवजण्यो मेळटात, तांचीं नांवां नोटीस बोर्डाचेर लावंक जाय. ग्रामसभेंत ताचेर चर्चा जावंक जाय. येवजण्यां खातीर तांणीच दाखले दिल्ले आसतात. म्हणटकच ते येवजणेक पात्र आसात काय नात, तें स्वराज्य संस्थांक बेसबरें खबर आसतलें. जर गिरेस्त, सरकारी नोकरी करपी कोण सांपडलो जाल्यार ताका सरकारान फारीक केल्ले सगले पयशे व्याजा सयत परत घेवपाक जाय. गांवांनी कोण गरीब, निराधार आसात, तेंय पंचायतींक खबर आसता. तांची वळेरी करून शक्य तितल्यो सरकारी येवजण्यो तांकां मेळोवन दिवप ही तांची लागणूक. थळाव्या आमदारानूय हातूंत लक्ष घालूं येता. बरेच लोक आपूण जावन ह्या येवजण्यां खातीर अर्ज करिनात. म्हणटकच पंचायतींनी फुडाकार घेवप बरें.
अक्षय उर्जा गरजेचीच
30 वर्सां पयलीं हरवळेंच्या घसघशार वीज तयार करपी यंत्रणा बसोवपाचो प्रयोग जाल्लो. पूण तो अपेशी थारलो. आतां परत नव्यान हरवळें घसघशार आनी गावणें, म्हैसाळ, चापोली, अंजूणें ह्या धरणांचेर 15 मॅगा वॅट तांकीचे हायड्रो पाॅवर प्लांट बसोवपाचो विचार चल्ला. चार धरणांनी उफेवपी सोलर पॅनल आनी तांचें केंद्र सुरू करतले. थंय 197 मॅगा वॅट वीज तयार जातली. ते विशींच्यो समजिकायेच्यो कबलातीय जाल्यात. हरवळेंच्या आदल्या वीज प्रकल्पा सारके हे अपेशी थारचे नात, हाची जतनाय वीज खात्याक घेवची पडटली. वाऱ्या पसून वीज तयार करपाक पवन चक्की (टर्बायन) बसोवपाचेंय थारलां. गोंयांत वाऱ्याक नेट नाशिल्ल्यान 100 मॅगा वॅट वायू उर्जा तयार करपाक व्हर्टीकल एक्सीस टर्बायन बसोवपाक प्रस्ताव मागयल्यात. योग्य जाग्यार हे प्रकल्प उबारून तयार जावपी वीज सबस्टेशनांक धाडप हेंय काम आसतलें. ताचे पयलीं तमनार प्रकल्पाचें काम पुराय जावंक जाय. सरकारी इमारतींचेरूय सोलर पॅनल बसयतले. पर्यटन राज्य आशिल्ल्या गोंयाक हाचे मुखार चडावत वीज लागतली. ते नदरेन आतां सावनूच यत्न केल्यार बरे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
