भांगरभूंय | प्रतिनिधी
आमदार युरी आलेमांवाचें अधिकाऱ्यांक निर्देश
मडगांवः पाड्डेचो अशीर रस्तो आनी पावसांत उदक भरून उरपाचे प्रकार बंद करपाचे निर्देश कुंकळ्ळीचे आमदार आनी विरोधी पक्ष फुडारी युरी आलेमांव हांणी अधिकाऱ्यांक दिल्यात.
विरोधी पक्ष फुडारी युरी आलेमांव हांणी संबंदीत अधिकारी आनी थळाव्या लोकां वांगडा पारोडा हांगाचे सुवातेची पळोवणी करून अशीर रस्तो आनी पावसांत उदक भरपाचे समस्येचेर उपाय काडपाचेर भर दिलो.
ह्या वेळार भौशीक बांदकाम खातें, उदका पुरवण, रस्ते विभाग, जीएसआयडीसी आनी हेर संबंदीत खात्यांचे अधिकारी हाजीर आशिल्ले.
मडगांव- केपें रस्त्या वयली वाहनांची येरादारी वाडिल्ल्यान पाड्डेचो अशीर रस्तो म्हणल्यार व्हड हुस्को जाला. हांगां ज्यो समस्या उप्रासतात त्यो आपणें स्वता पळयल्यात अशें सांगून युरी आलेमांव हांणी अधिकाऱ्यांक गरजेचीं पावलां उबारपाची सुचोवणी केली.
मडगांव-केपें रस्त्यार वाहनांची येरादारी वाडत आशिल्ल्यान पाड्डेचो मुखेल जिल्हो रस्तो एके सुवातेर अशीर आशिल्ल्यान येरादारी सुरळीत जावपाक आडखळ येता, ताचेर उपाय काडपाची गरज आसा अशें आलेमांव हांणी सांगलें.
ह्या आडखळीक लागून कश्यो समस्या निर्माण जातात हें गांवच्या लोकांनीय आपले नदरेक हाडून दिलां. ते उपरांत हांवें अधिकाऱ्यांक पावलां उबारपाक सांगलां आनी आतां हो प्रस्न सोडोवपा खातीर आमी कटिबद्ध आसात अशें आलेमांव हांणी सांगलें.
पावसांत ह्या वाठारांत कितल्याशाच कारणांक लागून उदक भरपाची समस्या जाता. आमी ताचीं कारणां सोदून काडल्यांत आनी ताचेर काम करतले. ताका लागून पावसांत थळाव्या लोकांक आनी हांगा येवप्यांक गैरसोय जावची ना, अशें आलेमांव हांणी सांगलें.
मडगांव- केपें रस्त्यार प्रवास करपी लोकांक थाकाय दिवप हो आमचो हेत आसा. हीं कामां बेगीन पुराय करपाची सुचोवणी आमी अधिकाऱ्यांक केल्यात अशें आलेमांव हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
