भांगरभूंय | प्रतिनिधी
केपें: फाटल्या कितल्याशाच दिसांच्यान चालू आशिल्ल्या उटंगाराच्या पावसाक लागून आठ दिसांनी दुसरे खेपे पाड्डें पूल आनी मडगांव- केपें रस्तो बुडलो. ह्या मार्गा वयली येरादारी चांदर मार्गान घुंवडायल्या.
घोग्यांनी पडपी पावसाक लागून कुशावती न्हंयेची पातळी वाडिल्ली. सोमार फांतोडेर ती आनीक वाडून पाड्डें पूल बुडलो आनी मुख्य रस्तोय उदका पोंदा गेल्ल्यान सगळी येरादारी चांदर मार्गान घुंवडायली. अंदूंच्या मोसमांत दुसरे खेपे कुशावती न्हंयेक हुंवार आयला. फाटल्या आयताराच पाड्डें पूल आनी मुख्य रस्तो उदका पोंदा गेल्लो. सोमारा राती हुंवाराचें उदक देंविल्लें. ते उपरांत आठ दिसांनीच परतून एकदां न्हंयेच्या उदकाची पातळी वाडली आनी पाड्डें पूल तशेंच मुख्य रस्तो बुडलो. कुशावती न्हंयेदेगेर सगळे कडेन उदक भरिल्लें. तशेंच शेतांनी, बागायतींनी उदक सांचून तळें जाल्लें. पाड्डें आनी अवडे ह्या दोन गांवांत जोडपाक कुशावती न्हंयेर पूल बांदला. अवडे पंचायत वाठार केपें मतदारसंघांत (केपें म्हाल) आनी पाड्डें हो कुकळ्ळी मतदारसंघांत (साश्ट म्हाल) येता. हो पूल बांदल्यार खूब वर्सां जालीं. दर मोसमांत तीन ते चार खेपे हो पूल उदका पोंदा वता, मात अजून मेरेन प्रशासना वतीन कसलीच उपाय येवजण करूंक ना. ते खातीर थळाव्या लोकां वांगडाच मडगांवां यो- वच करपी सगळ्याच लोकांक ह्या मार्गा वयल्यान येरादारी करतना त्रास जाता. कांय वर्सां आदीं तेन्नाचे मुख्यमंत्री मनोहर पर्रीकार हांणी स्वता येवन ह्या पुलाची पळोवणी केल्ली आनी उपाय येवजण करपाचें उतर दिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
