भांगरभूंय | प्रतिनिधी
केपें: गोंयांत पडपी उटंगराच्या पावसाक लागून अंदूंच्या पावसाळी मोसमांत पयलेच खेपे कुशावती न्हंये वयलो पाड्डें पुला वयल्यान उदक व्हांवपाक लागलां. तशेंच मडगांव ते केपें मुख्य रस्तो उदका पोंदा गेला. ताका लागून येरादारी चांदर मार्गान घुंवडायल्या.
फाटल्या कितल्याश्याच दिसांच्यान गोंयांत पावसान नेट धरला. ताका लागून न्हंयेच्या उदकाची पातळी वाडिल्ली. आयतारा दनपारां पाड्डें पुला वयल्यान उदक व्हांवपाक लागिल्ल्यान अवेडेंच्या लोकांक पाड्डें वचपाचो संपर्क तुटलो. हाका लागून अवडें कोठंबी वाठारांतल्या लोकांक पाड्डें वचपाचें आसल्यार आमोणें, केपें मार्गान वच्चें पडटालें.
अवेडें बाजार मुख्य रस्त्याचो कांय भाग उदका पोंदा गेल्ल्यान मडगांव ते केपें मुख्य मार्गा वयली येरादारी चांदोर मार्गान घुंवडायली. कुशावती न्हंयेच्या उदकाची पातळी वाडिल्ल्यान न्हंयेदेगार आशिल्ल्या बागायती, शेता- भाटांनी उदक भरलें. मॉन्सून काळांत दर वर्सां पाड्डें पुला वयल्यान 4- 5 खेपे उदक व्हांवता. पूण अजून मेरेन हाचेर प्रशासनान ठोस उपाय येवजण आखूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
