भांगरभूंय | प्रतिनिधी
भांगरभूंय । अजय लाड
मडगांवः आकें पायश नावेलीचो डेरीक डायस ह्या तरणाट्यान यत्ता बारावी जाले उपरांत नोकरे खातीर केल्ले यत्न अपेसी थारले. पूण कृशी विज्ञान केंद्रान 2010 त घेतिल्ल्या प्रशिक्षणांत तो मशिना वरवीं माडार चडपाक शिकलो. शाक भाजी उत्पदना पिकोवपा सयत पाडेली म्हूण काम करीत डेरीक फाटलीं 14 वर्सां अर्थीक नदरेन आत्मनिर्भरतेंतल्यान स्वयंपूर्णतेच्या मार्गार पावलां मारता.
तरणाट्यांनी शेती मळा कडेन वळचे हे खातीर गोंय शेती खात्या वतीन खूबशे तरेचे यत्न करतात. पडीक जमनी लागवडी खाला येवच्यो, गोंयांत कामगारांचो उणाव आशिल्ल्यान शेतकारंनी यांत्रीक शेती वटेन वळचे हे खातीर प्रशिक्षणां घेतात. अशेच तरेचें पाडेलींचो उणाव पयस करचे खातीर कृशी खात्या सयत दक्षीण गोंयांतल्या कृशी विज्ञान केंद्रा वतीन 2010 त प्रशिक्षण शिबीर घेतिल्लें. तातूंत डेरीक डायस हाणें वांटो घेतिल्लो. मशिना वरवीं माडार कशें चडचें आनी नाल्ल कशे काडचे, माडाची नितळसाण कशी करची, हें तो ह्या प्रशिक्षणांत शिकलो. कृशी खात्या कडल्यान त्या वेळार अनुदाना वरवीं माडार चडपाचें मशीन लेगीत डेरीकान घेतलें आनी होच वेवसाय करपाचें थारायलें.
बारावीचें शिक्षण पुराय केले उपरांत हेर भुरग्यां भशेन डेरीकान लेगीत नोकरे खातीर अर्ज केलो. सरकारी कार्यालयांचें हुमरे झरयले, पूण नोकरे खातीरचे यत्न अपेशी थारले. कृशी खात्या कडल्यान मेळिल्ल्या प्रशिक्षणाचो लाव घेवन डेरिकान घरच्यांच्या आदारान भातशेती सयत शाकभाजयेची लागवड करपाचें थारायलें. सकाळ- सांज पाडेली म्हूण काम करतना हेर वेळ शेती खातीर दिलो. फाटलीं 13- 14 वर्सा डेरीकान पाडेली म्हूण काम केलां. तशेंच 2020 त ज्या कृशी विज्ञान केंद्रांतल्या प्रशिक्षणांतल्यान शिकलोस थंयच ताका तरणाट्यांक प्रशिक्षण दिवचे खातीर आपयलो, तो खीण अभिमानाचो आसलो, अशें डेरीक सांगता.
दक्षीण गोंय कृशी विज्ञान केंद्रांतल्या प्रशिक्षणा वेळार मशिना वरवीं माडार चडून नाल्ल काडपाक शिकयले.
माडार चडचे खातीर ज्या यंत्राचो वापर करतात, ताची 100 कील मेरेन वजन उखलपाची तांक आसता. तशेंच सप्तकभर माडार चडपाची संवय केले उपरांत मनांतलो भंय लेगीत काबार जाता. तशेंच ट्रॅक्टर, टिलर, तण कांपपाच्या यंत्राचो वापर कसो करचो, हाचे सयत शेती, नुस्तें पोसप, दुकर पोसर, कोंबयो पोसप, फलोत्पादन, अश्या विवीध उत्पादनांतल्यान अर्थीक उत्पन्न मेळोवपाक जाता., अशें डेरीक हाणें सांगलें. 2020 त कृशी विज्ञान केंद्रांतल्या प्रशिक्षणा वेळार 20 जाणांक माडार चडपाचें प्रशिक्षण दिल्लें. ते उपरांत कोणेय आपयल्यार प्रशिक्षण दिवपाक वता. वाड्या वयल्या एका तरणाट्याक पाडेलीचें काम शिकयलें, आतां तोवय पाडेली म्हूण काम करता आनी घरसंवसार चलयता. हातूंत इल्ले श्रम आसात खरे, पूण कोणाच्या हाता खाला काम करचे परस स्वताचे घर स्वताचे हिकमतीचेर चलोवपाक जाता, अशें डेरीक हाणें सांगलें.
स्वयंरोजगारा खातीर गरजेचें प्रशिक्षण घेवचें
खूबशे तरणाटे शिकून बेरोजगार रावतात वा नोकरी सोदीत बसतात वा विदेशांत वचपाचो मार्ग आपणायतात. वेवसाय करपाक जातलो, अशें तरणाट्यांनी प्रशिक्षण घेवचें, सरकारी येवजण्यांचो फायदो घेवचो. पाडेली म्हूण काम करतना एका माडार चडपाक 100 रुपया मेळटात. वरभरांत पांच माड पाडले जाल्यार वरभरांत 500 रुपयांचें उत्पन्न मेळटा. तशेंच दीसभरांत आनीक हेर कामाय करपाक मेळटात, अशें डेरीक डायस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
