भांगरभूंय | प्रतिनिधी
-कृशी खात्या कडल्यान नामकरण, पांच लाखांच्या विम्याचें संरक्षण
पणजी : गोंयांत माडार चडून नाल्ल काडटात तांकां पाडेली म्हणटाले. पूण हाचे मुखार पाडेलींक ‘नाल्ल इश्ट’ ह्या नांवान वळखताले. ह्या नाल्ल इश्टांक पांच लाखांचो विमो दिवपाची प्रक्रिया कृशी खात्यान सुरू केल्या. ते खातीर आतां मेरेन खात्या कडेन 84 अर्ज आयल्यात.
कृशी अधिकारी श्रीकांत मोने हांणी शेनवारा आमच्या प्रतिनिधी कडेन उलयतना ही म्हायती दिली. नवी पिळगी पाडेली वेवसायांत येवपाक तयार नाशिल्ल्यान पाडेलींची संख्या फाटल्या कांय वर्सा पसून उणी जायत चल्ल्या. सध्या खात्या कडेन सुमार 600 पाडेलींची नोंदणी आसा. युवा पिळगेन वेवसायीक पाडेली जावचे, हे खातीर कृशी खात्यान तांचे नामकरण ‘नाल्ल इश्ट’ केलां. फाटल्या वर्सां पसून तांकां प्रशिक्षण दिवपाकूय सुरवात केल्या. राज्यभरांत वट्ट 115 जाणांक खात्यान प्रशिक्षण दिल्लें. अंदूं सांगें आनी सत्तरींतल्या दरेकी 20 प्रमाण 40 जाणांक प्रशिक्षण दितले, अशें मोने हांणी म्हणलें.
‘नाल्ल इश्ट’ म्हूण खात्या कडल्यान जे प्रशिक्षण दितात, तांकां माडाचेर चडपाचें यंत्र आनी सेफ्टी बेल्ट अशें सुमार पांच हजार रुपयांचें साहित्य कृशी खात्या कडल्यान फुकट दितात, अशेंय मोने हांणी सांगलें.
विम्याचे 94 रुपया सरकारच भरतले
नाल्ल इश्टांक संरक्षण म्हूण तांचो विमो काडपाची प्रक्रिया अंदूंच्यान खात्यान सुरू केल्या. सुरवातीक नाल्ल इश्टा कडल्यान दरेक वर्सा 94 रुपया भरून घेवन तांचो विमो काडपाचें निश्चीत केल्लें. पूण अातां, हें 94 रुपया सरकार स्वताच भरून तांचो पांच लाखांचो विमो काडटले. ते खातीर आतां मेरेन खात्या कडेन 84 अर्ज आयल्यात. फुडल्या काळांत अर्जांचे संख्येंत आनीक वाड जातली, अशेंय मोने हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
