भांगरभूंय | प्रतिनिधी
नाल्ला बगर गोंयकांराचें जेवण जायना. हुमणा खातीर, रोसा खातीर, गोडश्या खातीर, भाज्जे खातीर सोय जायच. देव कार्याक, होटी भरपाक, गाराणे घालपाक, पुर्णाहूती दिवपाक, होळये मुखार फोडपाक नाल्ल जायच.
नाल्लाक तीन दोळे म्हणून ताका पुजेन म्हादेवाचो, शंकराचो मान. भटाक, भगताक परबेक नाल्ल फावा जाता. कोणाक कडेक काडपाक सकयल देवोवपाक नाल्ल दिलो अशेंच म्हणटात. असो हो गोंयकारांची जीण व्यापून रावपी नाल्ल पाडेल्या बगर आमच्या हाताक लागप कठीण. भाट पाडट्टलो जाल्यार पाडेली जायच. कांय वर्सां फाटीं गांवांनी जाय ते पाडेली आसले. आयज परिस्थिती बदल्ल्या. पाडेल्या बगर नाल्ल झडून वतात. एक- एक नाल्ल पुजोवन गरज भागोवपाची. मागीर एक दीस अकस्मात खाडू़ं कोयतो घेवन पाडेली दारांत हजर जाता. वेळ आसूं नांसू ताका परत धाडप ना. परत धाडल्यार दुसरे फावट मेळत म्हणून सांगपाक जायना. इतले दीस आपूण कित्याक पावलोना हें सांगपाक ताचे कडेन भोरोभर कारणां आसतात.
मांय नाजाल्यार बायल दुयेंत जाली, भुरगो मोटारसायकल घेवन पडलो, जात्रा, शिगमो अशीं दरवेळा किदें ना किदें कारणां. आयकपाचें, ओगी रावपाचें. परतें विचारपाचें ना. कारणाचें पुराण सोंपल्या उपरांत तो झपाझप एवरेस्टाचें तेंमक सर करूंक गेल्ल्या सारको माडाचे तेंगशेर पावता. नाल्ल हालोवन पळयता. मागीर जून जाल्या नाल्लांच्यो पेणी (पेंड?) मारता. चुट्टां मारता, माड नितळ करता आनी मागीर सरभोंवतणी नदर मारीत सकयल देंवता. चवथीक माटोळेक बांदपाक लागता ती पेंण हातांत घेवन देंवप हें सोपें काम न्हय. बाणस्तारच्या चवथीच्या बाजाराक देंवेल्ली म्हणून मेळपी पेंड देवंयल्लीच आसतली म्हणून सांगपाक जायना.
भाटांतले माड पाडपी पाडेली तसो कुळागरांत माडयो पाडपी पाडेली. एके माडये वयरसून दुसरे तिसरे माडयेर झेल मारपी आयज तितलेशे दिसनात. झेल मारतना माडी मोडून सकलय पडून जीव व्हगडावपाच्यो, जल्मभर कुल्पाद जावन शरपंजरार पडपाच्यो घटना घडल्यात.
पाडेली नाल्ल पाडटा. ते विकून, घरा वापरून उरिल्ल्या नाल्लाचें खोबरें जाता. तें बरें वतान सुकोवन ताचें बरें तेल काडप. खोबरेलान तळिल्लें नुस्तें ना जाल्यार बटाट्याच्यो फोडी एकदम रूचीक. खोबरेल तेल खावन कोणाक काॅलेस्ट्रोल जालेना. आपलें तेल खपोवपाक खोबरेलाक ओगीच बदनाम केलें. बाळ- बाळंटणीक खोबरेल तेलाचें मालीश एका तेंपार आनी आयजूय आमकां गरजेचें दिसता. आयचे दोतोर कानात तेल घालू नाका म्हण्टात. जांणी भुरगेपणात कानात तेल घालें तांचे कान बरे शाबूत आसात. माथ्या वयले केस जाण्टेपणांत लेगीत काळे कुळकुळीत आसात.
इतल्या म्हत्वाच्या माडाक आयज रोग सतायतात. दुसरे व्हटेन पाडेली मेळप कठीण जालां. मशिनान माडार चडपी मेळटात. पूण, परंपरागत पाडेल्यांची शान मात तांकां कशीच येना.
उमाकांत शेट्ये
सियाटेल- अमेरिका
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
