भांगरभूंय | प्रतिनिधी
पणजीः पणजे शेनवारा सकाळीं सगळो बोवाळ पळोवपाक मेळ्ळो. पाट्या पुलार चर धापपा खातीर लायिल्ली लोखणाची प्लेट सुटली आनी हे प्लेटी वेल्यान गाडयो चलोवप कठीण जावपाक लागलें. देखून पाट्यार गाडयांच्यो रांको पळोवपाक मेळ्ळ्यो. ही बातमी पत्रकारांनी बरीच गाजयले उपरांत अधिकार्यांनी दखल घेवन ही प्लेट जाग्यार घाली.
पणजे शाराक जोडपी नवो पाटो पूल आनी जमीन हांचे एलयांटमेंट जुळटा थंयसर व्हडलो चर पडिल्लो. ताचे वेल्यान गाडयो चलयतना त्यो धाडवताल्यो. डांबर भरून लेगीत थंय कांयच फायदो जावंक ना. ताका लागून सासणाचो उपाय म्हण जड आनी दाट लोखण्याचो प्लेटी घाल्ल्यो.
लोखणाच्यो प्लेटी बऱ्या दर्जाच्यो आशिल्ल्यो. मात त्यो लावपाचें काम मात बाबत जाल्लें. दोन दीस पयलीं ह्यो प्लॅटी मारिल्ल्यो, पूण त्यो वयले वयर लायिल्ल्यान गाडयो वचून ताचे वॅल्डींग सुटलें आनी ही प्लेट निखळ्ळी.
आयज हे प्लेटी वेल्यान गाडी काडटना जतनाय घेवची पडटाली. चालक गाडयो ल्हव काडटना हांगा गाडयांची गर्दी जाताली. हे प्लेटीवेल्यान गाडयो चलयतना ते प्लेटींचो नेटान आवाज आयकूंक येतालो. उपरांत ह्या वेळार थंय आशिल्ल्या पत्रकार आनी ड्रायव्हरांनी फुडाकार घेवन ही निखळिल्ली प्लेट आसा तशी जाग्यार बसयली. मात येरादारीक लागून ती परत देंवली. हाका लागून पाटो पूल ते पणजी बस स्टॅण्डा मेरेन गाडयांच्यो लांब रांको लागिल्ल्यो.
हे प्लेटी वेल्यान लोक जीव मुठींत घेवन गाडयो काडटाले. प्लेट सुटिल्ल्यान अपघात जावन व्हडली घडणूक घडपाक शकताली. मात कोणाक कांयच जावंक ना.
मजगती हे सगळे घडणुकेचो व्हिडीयो सोशल मिडीयाचेर बरोच व्हायरल जाले उपरांत प्रशासनाक जाग आयली. बेगोबेग सगळीं यंत्रणां जाग्यार घालून भौशीक बांदकाम खातें आनी पणजी ट्रॅफीक सेल सुवातेर पावले. येरादारीचें योग्य वेवस्थापन करून ह्यो प्लेटी बसोवपाचें काम हातांत घेतलें. पुलिसांनी येरादारी एके वटेनच्यान चालू दवरली जाल्यार आनी दुसरे वटेन प्लॅटी बसोवपाचें काम हातांत घेतलें. क्रेनीचे मजतीन ह्यो प्लॅटी परत काडल्यो आनी सामक्यो जाग्यार घालून त्यो परत वॅल्डींग केल्यो आनी उपरांत येरादारी सुरळीत जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
