भांगरभूंय | प्रतिनिधी
भुरग्यांक जेवण भरयतना, तांच्या ल्हान- ल्हान बोटांनी मोबायल फिरोवप हें सादारण दृश्य जालां. एक काळ जेवण भरयतना नातें घडोवप, काणी सांगप वा खावपाक उर्बा दिवपाचो वेळ आसतालो, तो आतां…
आयच्या वेगान चलपी संवसारांत, जंय सुविधा चड करून निर्णय घेवपाक सांगतात, थंय जायते तरणाटे पालक आपल्या भुरग्यांक गुंतोवपाक आनी मनरिजवण करपाक साधनां म्हणून मोबायल फोन आनी टॅबलेटा कडेन वळटात. सादी पाटी, जी एक काळ हर भुरग्याच्या बॅगांत आनी घरांत सांपडटाली, आतां ती ‘स्क्रीना’च्या जमान्यांत विसरल्या. पूण जशी आमी डिजिटल भविश्या कडेन वेगान वतात, तशें थोडे रावन विचार करपाक जाय. “आमी भुरग्यांक दितांत तें कितें!
पाटी ही फकत एक सादी बरोवपाची फळी न्हय, हें धीराचें आनी सरावाचें साधन. ही मेहनत, पुनरावृत्ती आनी प्रत्यक्ष शिकपाचें प्रतीक. पाटयेर बरोवन भुरग्यांचे बारीक हालचालींची कुशळटाय वाडोवप, वर्णमाळा शिकप, अंकांचो सराव करप आनी “करप आनी परतून करप.” हांगा कसलोच शॉर्टकट ना, बॅकस्पेस बटण ना — फकत एक भुरगें, एक खडू आनी परत परत यत्न करपाची इत्सा. ती टिकावूपणाचीय शिकवण दिता. पर्यावरणाचें शिक्षण दिता. पाटी हें पुनर्वापर करपाक मेळपी साधन, जाका चार्ज करपाची वा इंटरनेट कनेक्शनाची गरज ना. हें पर्यावरण अनुकूल आनी सवाय साधन. सगळ्यांत म्हत्वाची गजाल म्हळ्यार पाटी लक्ष केंद्रित करपाक मजत करता. गॅजेट्सा भशेन, पाटीचो बीप वा संदेश येवन उबो रावना, खेळ वा जाहिराती दाखयना. तंत्रज्ञानाची शक्त नाकारूंक जायना, स्क्रीन ही जगाची वाट उघडपी दार. योग्य तरेन वापरल्यार डिजिटल साधनां शिक्षणाचें बरें साधन जावं येतात.
शिक्षणात्मक ॲप्स, ऍनिमेशन काणयो, उच्चार आनी भास विकासाचीं साधनां, आनी ल्हान भुरग्यांच्या शिक्षणा खातीर YouTube Kids सारके प्लॅटफॉर्म. भुरग्यांक आतां घरा बसून तारे, डायनासॉर वा जागीक संस्कृतायेचे विशीं शिकपाक मेळटा. पूण पालकांच्या मार्गदर्शनाशिवाय शिक्षण दिवपी डिजिटल स्क्रीन सहजपणान चुकीची वाट दाखोवंक शकता. मोबायलाचो चड वापर करपाची भुरग्यांची चड प्रवृत्ती आसता. खेळ वाचनाची सुवात घेतात, व्हिडियो कल्पनेची सुवात घेतात. मागीर प्रस्न विचारपाची आनी स्वतंत्रपणान विचार करपाची कुवत बदलता. “फक्त 15 मिनटां शिकप” हें मागीर एक वर स्वायपिंगांत रुपांतरीत जाता.
हालीं भुरग्यांक जेवण भरयतना, तांच्या ल्हान- ल्हान बोटांनी मोबायल फिरोवप हें सादारण दृश्य जालां. एक काळ जेवण भरयतना नातें घडोवप, काणी सांगप वा खावपाक उर्बा दिवपाचो वेळ आसतालो, तो आतां स्क्रीना कडेन पावला. स्क्रीना मुखार भुरग्याक जेवण घालप हें तांची सैमीक भूक- तान जाणवपाची तांक कमी करूंक शकता, आवय- भुरग्यांचो संवाद उणो करूंक शकता आनी मुळाव्या गजालीं खातीर गॅजेट्साचेर ल्हानपणा सावन अवलंबन निर्माण करूंक शकता. ही तंत्रज्ञानावर बंदी घालपाची मागणी न्हय, तर ताचो संतुलीत वापर करपाची याद. पाटी आनी स्क्रीन एकामेकां बरोबर रावूंक शकतात- जर आमी, आवय- बापूय म्हणून, म्हायतीचेर आदारीत निवड करची.
पालकांनो, भुरग्याच्या जिविताचीं घडपाचीं वर्सां फकत श्रीगणेशा, 1 2 3 वा ABC शिकोवपाचींच न्हय, तीं सवयी, लक्ष केंद्रित करपाची मुदत, निर्मिती क्षमताय आनी भावना घडोवपाचींय आसतात. तंत्रज्ञान, मर्यादा ना जाल्यार, तें झटपट सुशेग दिवंक शकता, पूण आवयन भुरग्याक बरोवंक, रेखाटूंक वा प्रस्न विचारुंक शिकयतना घेतिल्ले कश्ट तें भरून काडूंक शकना. देखून, बरी पाटी आनी खडू परतून घेवचे. आपल्या भुरग्या बगली बसून तें बरोवपाक शिकोवचें. तांकां चुको करुपाक दिवच्यो आनी ताचे पसून शिकूंक दिवचें. आनी हय, तांकां स्क्रीन एक्स्प्लोर करूंकय दिवचें, पूण तुमच्या मार्गदर्शना खाला. कित्याक बरें शिक्षण म्हणल्यार तें न्हय जें तुमी आपल्या भुरग्याक दितात, तर तें जें तुमी तांकां वांगडा वांटून घेतात.
सोनिया मुकेश देसाय
91587 69312
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
