भांगरभूंय | प्रतिनिधी
पाटणेकार : राबितो प्रकल्पाक थळाव्यांचो विरोध
भांगरभूंय । प्रतिनिधी
काणकोण : पाटणे गांवांत वीज, उदक आनी रस्तो ह्या मुळाव्या सुविधांचो उणाव आसा. तातूंत दिल्लीच्या एका मनशान ह्या ल्हानश्या वाड्याचेर राबितो प्रकल्प हाडपाचे नदरेन कामाक सुरवात केल्या. हो प्रकल्प उबो जावपा आशिल्ले सुवातेर वचपाक आशिल्लो रस्तो फक्त साडेतीन मिटर रूंद आसा. मात नगर नियोजन खात्यान ह्या प्रकल्पाक परवानगी दितना थंयचो रस्तो 10 मिटर आशिल्ल्याचें म्हणलां. थंय वीज, उदक हाची समस्या आसा. नगर नियोजन खात्यान खंयच्या आदाराचेर त्या प्रकल्पाक परवानगी दिल्या? ह्या प्रकल्पाक परवानगी दिवपी नगर नियोजन खात्याचेर गांवांतल्या लोकां वांगडा मोर्चो व्हरतले आनी जाब विचारतले अशी शिटकावणी समाज कार्यकर्ते वैभव फळदेसाय आनी अनील फळदेसाय हांणी दिला. पाटणे येवपा आशिल्ल्या ह्या राबितो प्रकल्पाचे सुवातेर वचपी अशीर रस्त्या वयल्यान दोन चारचाकी वचपाक शकनात. अश्या वेळार राबितो प्रकल्प आयल्या गाडयो सुरळीत तरेन वचपाची वेवस्था कशी जातली? ह्या पाटणे वाड्याचेर मल्लिकार्जून देवाच्या तरंगांचो विरामेळ आनी हेर धर्मीक विधी जातात. थंयचो रस्तोच बंद केलो जाल्यार वर्सुकी धर्मीक विधी कशे पुराय जातले, असोय प्रस्न अनील फळदेसाय हांणी उपस्थीत केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
