भांगरभूंय | प्रतिनिधी
खबरां संस्था
नवी दिल्ली : पाटणांत भाजप आनी काँग्रेस कार्यकर्त्यां मदीं आकांताचीं झगडीं जालीं. केंद्रांत सत्तेर आशिल्ल्या भाजपच्या कार्यकर्त्यांनी राहूल गांधी हांची मतदार अधिकार यात्रे वेळार प्रधानमंत्री नरेंद्र मोदी आड हरकत घे सारकें विधान केल्ल्याच्या विरोधांत काँग्रेस कार्यालयाचेर हल्लो केलो.
दोनूय पक्षांनी एकामेकाचेर झगडीं पेटोवन घालपाचो आरोप केला. भाजप कार्यकर्त्यांच्या म्हणण्या प्रमाण, ते पाटणांत काँग्रेस कार्यालया मुखार शांतिकायेन आंदोलन करताले, तेन्ना लोकांनी कथीत तरेन फातर शेंवटुवपाक सुरवात केली. दुसरे वटेन काँग्रेस पक्षान भाजप कार्यकर्त्यांचेर भायल्यान फातर शेंवटिल्ल्याचो आरोप केला.
साबार भाजप कार्यकर्त्यांक पाटणांतल्या काँग्रेस कार्यालयाचे गेटीचेर खोंटो मारतना आनी भितर घुसतना पळयल्यात. दोनूय पक्षांचे कार्यकर्ते पाटणांतल्या काँग्रेस कार्यालया भायर पक्षाचे बावचे घेवन एकामेकाक मारबडय करतना दिसल्यात.मजगतीं, राहूल गांधी हांचे यात्रे वेळार माचये वयल्यान प्रधानमंत्री मोदी हांचे आवय विशीं वायट उतरांचो वापर केलो आनी ताचो व्हिडियो सोशल मिडियाचेर व्हायरल जालो. म्हत्वाची गजाल म्हणल्यार ही तीच सुवात आशिल्ली जे सुवाते वयल्यान राहूल गांधी, ताची भयण आनी काँग्रेसीची म्हासचीव प्रियंका वाड्रा आनी राजद फुडारी तेजस्वी यादव मोटरसायकली वयल्यान मुजफ्फरपुर वचपाक भायर सरिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
